БИШКЕК, 3-янв. – Sputnik. Мамлекеттик органдардын өкүлдөрү Түркияда теракт жасоого шектелген согушкер паспортун Кыргызстандан алган делген маалыматка комментарий беришти.
Учурда терактыны 28 жаштагы кыргызстандык Яхья Машрапов жасашы мүмкүн деген маалыматтар таркап жатат. Анын атына жазылган паспорт Түркиянын TRT World мамлекеттик телеканалынан көрсөтүлгөн. Документ 2016-жылдын 21-октябрында Кыргызстандын Мамлекеттик каттоо кызматы тарабынан берилген.
Turkish authorities have confirmed that the #Istanbul attacker is Lakhe Mashrapov, a 28-year old citizen from Kyrgystan pic.twitter.com/s4cY0ncKHg
— Michael Horowitz (@michaelh992) 3 января 2017 г.
Мамлекеттик каттоо кызматынын жетекчиси Тайырбек Сарпашевдин айтымында Мамкаттоо бардык материалдарды УКМКга өткөрүп берген.
“Биз бардык маалыматтарды Улуттук коопсуздук комитетке өткөрүп бергенбиз. Бардык паспорттук маалыматтар менен бардык биометрикалык база ошолордо. Андан башка эч нерсе айта албайм”, — деди Сарпашев.
Кыргызстандын Түркиядагы элчиси Ибрагим Жунусов Түркиянын премьер-министри Биналы Йылдырым “туура эмес маалыматтарды бербегиле” деп айтканын белгиледи.
“Согушкердин улуту азырынча белгисиз. Аны кыргыз деп жазып жаткан маалыматтар чындыкка жатпайт. Бул боюнча Түркиянын премьер-министри Биналы Йылдырым дагы “жалган маалымат таркатпагыла” деп кайрылуу жасады. Биз Тышкы иштер министрлиги менен дагы сүйлөштүк, алар ЖМКга тараган маалыматтарды төгүндөдү. Социалдык тармакка таркаган паспорттогу жаран согушкер эмес башка эле бирөө болуп калышы дагы ыктымал”, — деп белгиледи элчи.
Рейтер агенттигинин маалыматына ылайык, терактынын жоопкерчилигин “Ислам мамлекети” террордук уюму өз мойнуна алган.
