БИШКЕК, 3-ноя. — Sputnik. Исфана шаарында MAN үлгүсүндөгү май ташуучу унаанын оодарылышынан 11 адам жабыркап, кырсыкка кабылган 17 унаанын төртөө жараксыз абалга келген. Бул тууралуу ӨКМ билдирди.
Эскерте кетсек, бүгүн түшкө маал шаардын борбордук базарынын алдында жеке менчик май ташуучу унаа 17 жеңил машинаны уруп барып, оодарылып калган. Алдын ала маалымат боюнча цистернадагы 20 тонна күйүүчү май агып калган. Кырсык болгон жерде өрт чыккан эмес.
"Жол кырсыгынан 11 адам жабыркап, анын үчөө ооруканага жактырылган. Ал эми жабыр тарткан 17 унаанын төртөө жараксыз болуп калды", — деп айтылат билдирүүдө.
Учурда тийиштүү кызматтар оодарылган унааны ордуна тургузуп, жолду тазалап жатышат. ӨКМ кырсыктын чоо-жайы боюнча кошумча маалымат берилерин кошумчалады.
