БИШКЕК, 27-ноя. — Sputnik. Дин таануучу Кадыр Маликовго кол салууга байланыштуу бейбашчылык беренеси боюнча кылмыш иши козголду. Кылмышка шектүүлөр ким экени аныкталып, аларды кармоо аракеттери жүрүүдө деп билдирди ИИМ.
Маалыматка ылайык, кечээ, 26-ноябрда Октябрь РИИБине саат 19.14төрдө Асанбай кичи районундагы №52 үйгө жакын орун алган "Народный" дүйкөнүнүн жанында белгисиз эки киши Кадыр Маликовду бет тушка сайып кеткени жөнүндө маалымат келип түшкөн. Алар окуя болгон жерден из жашырып кетишкен.
Бишкек ШИИБи кылмышкерлерди кармоо боюнча "Перехват" планын жарыялады. Окуяга күбө болгон 25тен ашык киши көрсөтмө берген.
Күбөлөрдүн айтымында, дүкөндөн чыккан Маликов унаасынын артына машинасын токтотуп койгон балдардан жолду бошотуп, өткөрүп коюуну суранган. Экинчи жолу кайрылганда тигилер каяша айтып, мушташка өтүшкөн. Дал ошол учурда Маликовдун денесине бычак сайылганын ИИМ билдирет.
Учурда Бишкек ШИИБ жана Октябрь РИИБдин кызматкерлери тарабынан Бишкек шаарынын чет-жакасындагы жаңы конуштардын биринен BMW үлгүсүндөгү автоунаа табылган. Кылмышка шектүүлөр ким экени аныкталып, аларды кармоо аракеттери жүрүүдө.
