БИШКЕК, 16-сен — Sputnik. Тажикстан ИИМи козголоңчу генерал, коргоо министринин мурдагы орун басары жок кылынгандыгын тастыктады. Бул туурасында ИИМдин Тажикстандын мамлекеттик телеканалы аркылуу берилген расмий маалыматында айтылды.
Буга чейин ИИМ Ромит капчыгайындагы атайын операцияда Тажикстандын коргоо министринин мурдагы орун басары Абдухалим Назарзода жана анын шакирти, аталган министрликтин полковниги Жунайдулло Умаров жок кылынгандыгын билдирген. Аны менен кошо бандалык топтун сегиз мүчөсү жок кылынган.
"Ромит капчыгайындагы атайын операцияда Тажикстандын коргоо министринин мурдагы орун басары Абдухалим Назарзода жана анын шакирти, аталган министрликтин полковниги Жунайдулло Умаров жок кылынды", — деп айтылат маалыматта.
Ошол эле убакта аэропорттун бурулушунда куралдуу күчтөр менен милициянын ок атышуусу болгон.
Душанбеде кол салуу учурунда Тажикстандын ИИМ жана коргоо министрлигинин 33 кызматкери жана мурдагы министрдин орун басарынын жактоочуларынан турган топтун тогуз кишиси өлгөнү жөнүндө жума күнү Коргоо министрлигиндеги маалымат булагы билдирген.
ИИМдин маалыматына ылайык, кол салууну коргоо министринин мурдагы орун басары, "кылмыш иштери" үчүн президент тарабынан бир жума мурун кызматтан алынган Абдухалим Назарзода башкарган.
Назарзоданын тобундагыларды табуу жана жок кылуу боюнча атайын операция башталгандан тарта 130 тарапкери кармалып, 20дан ашыгы жок кылынган.
