БИШКЕК, 23-июнь — Sputnik. Ала-Бука райондук ооруканага 22-июнда кечки саат жети жарымда алты адам түшкөн, алардын ичинен бир эркек бала жана бир кыз реанимацияда, абалы абдан катуу. Калган төртөөнүн абалы оор болгону менен, туруктуу экендигин райондун аймактык ооруканасынын башкы дарыгери Жыргалбек Осмоналиев Sputnik маалымат сайтына билдирди.
Башкы дарыгер түшкөн алтоонун бирөөсү, айдоочу 1991-жылы, калгандары 1997-жылы туулган балдар экенин айтты. Анын айтымында, жандандыруу бөлүмүндө жаткандардын баш мээси жабыркап, башына кан уюп калган.
"Жалал-Абад шаарынан келген нейрохиругдар, азырынча экөөнүн абалы оор болгондуктан, операцияны көтөрө албастыгын аныктап, учурда байкоо салып туруу керектигин айтышты. Кыздын көк боору жанчылып, бөйрөгү үзүлүп кетиптир",— деди Осмоналиев.
Башкы дарыгердин айтымында, жабыркагандардын баарынын баш сөөктөрү жабыркаган, мээлерине кан куюлуп, ийиндери, бел сөөктөрү сынган.
"Алардын канында алкоголь бар-жогун азырынча тактай элекпиз, анализдерди алып милицияга бергенбиз, ал биохимиялык анализ чыккандан кийин билинет", — деди башкы дарыгер.
Башкы дарыгер Осмоналиев жол кырсыгына кабылгандар кечки саат жети жарымда келип түшкөндүгүн, райондук ооруканын дарыгерлери түнү бою иштеп, балдардын өмүрүн сактап калганга болгон аракетин жасаганын, медиктердин алды жаңы гана эс алганы үйлөрүнө жиберилгенин кошумчалады.
Премьер-министр Темир Сариев 22-июнда Жалал-Абад облусунун Ала-Бука районундагы үч адамдын өмүрүн алган жол кырсыгын териштирүү тапшырмасын берди.
