БИШКЕК, 17-май — Sputnik. 15-майда камакка алынган депутат Карганбек Самаковдун баш коргоо чарасы боюнча караган Бишкек шаарынын Октябрь райондук соту аны 2 ай үй камагына алууга чечим чыгарды.
Сотто Абир Шагивалиев төрагалык кылды. Самаков буга чейин соттолбогондуктан жана Жогорку Кеңештин депутаты болгондуктан үй камагына чыгаруу чечимин кабыл алган. Сот ошондой эле, Самаков убактылуу кармоо жайына алынып келгенде, кан басымы 220га 120 болгонун аныктаган УКМКнын медициналык кызматынын маалымкатына таянган. Андан сырткары Жогорку Кеңештин сегиз депутаты Самаков чыгарылсын деген сунушка кол коюп беришкени кабарланууда.
Самаков Жогорку Кеңештин IV чакырылышына "Ата Мекен" саясий партиясынын тизмеси боюнча депутат болуп келген. Бирок, ал 2014-жылдын аягында андан чыгып, өзүнүн партиясын түптөгөндүгүн айткан.
Ал КМШ Парламент аралык Ассамблеясынын (ПАА) Саясий маселелер жана эл аралык кызматташуу боюнча туруктуу комиссиясынын төрагасынын орун басары. ЮНЕСКО иштери боюнча улуттук комиссиянын төрагасынын орун басары.
