БИШКЕК, 15-май — Sputnik. Парламентке “Ата Мекен” партиясынын тизмеси менен депутат болуп келген Карганбек Самаков камакка алынып, УКМКнын тергөө абагына киргизилгендигин Башкы прокуратурадан Sputnik кабарчысына билдиришти.
Депутатка жана бир катар башка адамдарга Кылмыш жаза кодексинин 303-беренеси, Коррупция боюнча кылмыш иши козголгондугу маалым болду. Башкы прокуратуранын билдирүүсүндө Чүй облусуна караштуу Кара-Жыгач, Байтик жана Лебединовка айыл өкмөттөрүнө караштуу 262 гектар жерди мыйзамсыз менчиктеп алгандыгы туурасында айтылат.
Буга чейин депутатка Бишкектин айланасындагы жерлерде мыйзамсыз менчиктеп алды деген дооматтар айтылып келип, бир катар тараптар буга нааразы болуп жаз айында митингге да чыккан.
Башкы прокуратурадан тергөө иштери жүрүп жаткандыгын кошумчалашты.
Самаков акыркы күндөрү ЖК депутаттары менен катар эле округда жүрүп, кечээ, 14-майда Кочкордон келген.
Учурда Бишкек шаарындагы УКМКнын имаратынын жанында анын тарапташтары топтолуп турат.
