БИШКЕК, 20-фев. — Sputnik. Тергөө комитетинин башкы тергөө башкармалыгынын тергөө тобу Минскидеги бычакталып өлтүрүлүп, буту байланган тейде сөөгү автоунаанын багажынан табылган кишинин өлүмү боюнча бардык жагдайларын карап жатат деп жазды Беларусиядагы Sputnik маалымат сайты.
Жалпыга маалымдоо каражаттары (ЖМК) жазган 18-февралда, Беларусиянын борборунда Минскиде өлтүрүлгөн киши Кыргызстандагы криминалдык төбөл Алмамбет Анапияев экендигин эки өлкөнүн тартип коргоо органдары тастыкташа элек.
"Минскинин Карл Либкнехт атындагы көчөсүндө табылган кишинин өлүмүнүн бардык жагдайларын иликтеп жатат. Анын ким экендигин аныктоонун бир жолу — сөөктү аныктоо иши", — деп билдирди жума күнү Sputnik сайтынын кабарчысына Беларусиянын Тергөө комитетинин расмий өкүлү Сергей Кабакович.
Ал ЖМКда өлтүрүлгөн адамдын кылмыш дүйнөсүнө катышы бардыгын аныктоо иштери да жүрүп жаткандыгын кошумчалады.
"Каза болгон адамдын ким экендигин жана кандай жагдайда өлтүрүлгөндүгүн аныктоо улантылууда. Соттук-медициналык, генотипоскопикалык жана бир катар экспертизалар дайындалды. Табылган автоунаа турган жерлери жана болжол менен жашаган жерлери текшерилди. Тергөөчүлөр кылмыш ишинин алкагында күбөлөр менен иштеп жатышат", — деп айтып берди Кабакович.
Тергөөгө керектүү маалыматтары алуу үчүн Беларусь тартип коргоо органдары башка мамлекеттердин тартип коргоо органдары менен байланышып, сүйлөшмөкчү. Тергөө укуктук жактан жардам көрсөтүү үчүн өтүнүчтөрдү даярдап жатат деп белгиледи аталган кызматтын өкүлү.
