БИШКЕК, 19-янв — Sputnik. Кыргыз-өзбек чек арасында курал колдонгон инцидент болгонун Мамлекеттик чек арасы кызматынын маалымат кызматы билдирди.
Маалыматка ылайык, аталган окуя 18-январда Ала-Бука чек ара отрядындагы "Көк-Серек" чек ара заставасында болгон.
"Кыргыз-өзбек чек арасын күзөтүп жүргөн чек ара наряды Ала-Бука районуна караштуу Ажек аймагынан Өзбекстандын 3 жаранын көрүшкөн. Алар аңчылык кылып, мамлекеттик чек араны мыйзамсыз өтүп, Кыргызстандын аймагына кирип кетишкен. Алар чек ара нарядынын куралды тапшырып, багынып берүү буйругуна көнбөстөн, чек арачыларга карата ок аткан. Чек арачылар да аларга карата ок атып, бир мергенчи жаракат алган. Калган эки жаран окуя болгон жерден качып кетүүгө аракет жасаган маалда өзбек чек арачылары тарабынан кармалган", — деп айтылат маалымат кызматы тараткан билдирүүдө.
Жаракат алган мергенчиге биринчи медициналык жардам көрсөтүлгөн. Эки мамлекет ортосунда буга чейин жетишилген макулдашуу боюнча жаракат алган мергенчи жана 3 мергенчи мылтыгы окуя болгон жерге келген өзбек чек арачыларына өткөрүлүп берилген.
Кыргызстан менен Өзбекстандын чек арачыларынын жолугушуусунан кийин эки тарап тең окуянын чоо-жайын иликтемей болушту.
Алмазбек Атамбаев бул кол салуудан каза болгон жана жабыр тарткандарга материалдык жардам берүү боюнча буйрукка кол коюп, аны дыкат текшерүүнү тиешелүү органдарга тапшырган.
