Бишкек, 26-фев. — Sputnik. Жогорку Кеңеш өкмөттүн "Centerra Gold Inc." менен бирдей үлүштөгү биргелешкен "Кумтөр" ишканасын түзүү боюнча токтомдордун аткарылышын канааттандырарлык эмес деп таап, канадалык тарап менен мамлекеттин пайдасын көздөгөн сүйлөшүүлөрдү жүргүзүүгө дагы бир ай убакыт берди. Мындан сырткары өкмөткө 2015-жылдын 16-мартына чейин "Кумтөрдү" улутташтыруу боюнча мыйзам долбоорун иштеп чыгып, парламентке алып келүүгө тапшырма берди.
Талкуунун жүрүшүндө депутаттар Жогорку Кеңештин чечиминде экология, техника, рекультивация, трастык фонддор боюнча берилген тапшырмалар аткарылбагандыгын сынга алышты. Ошону менен катар компания кенди жер алдынан казуудан баш тартып жаткандыгы маалымдалып, бул боюнча сүйлөшүүлөр уланып жаткандыгы айтылды.
Талкуу учурунда парламентарийлер "Кумтөр" маселесин чечүү боюнча өкмөткө бул маселени чечүүгө эки жылга чукул убакыт бергенин белгилешип, эми дагы сурап жаткан бир айда маселе чечилерине күмөн санаган сындар айтылды.
Депутаттар тарабынан биргелешкен ишкананы түзүүдө кенден чыккан продукциянын негизги үлүшү, 70 пайызы Кыргызстанга тиешелүү болушу керектиги айтылды. Бир катар парламентарийлер өкмөттү отставкага кетирүү керектигин сунушташса, бир катары дагы бир айлык мөөнөт берүү зарылдыгын айтышты.
Парламентке "Кумтөр" маселеси боюнча маалымат берүүгө премьер-министр Оторбаев, биринчи вице-премьер-министр Тайырбек Сарпашев, вице-премьер-министр Валерий Диль, "Кыргызалтын" ААКтын жетекчиси Токон Мамытов келди.
