БИШКЕК, 8-янв — Sputnik. Алтын казуучу канадалык "Центерра" компаниясындагы "Кыргызалтын" ААКтын 60% акциясынын камакка алынышы боюнча соттук териштирүү улантылууда. Бул тууралуу "Кыргызалтын" ААК башкармалыгынын төрагасы Токон Мамытов билдирген.
Анын айтымында, соттук териштирүү жүрүп жаткандыктан соттун чечими кандай болорун так айтуу кыйын.
"Соттун чечимин күтүп жатабыз. Жумшартып айтканда, алтын казуучу Stans Energy компаниясы туура эмес мүнөздөгү маалыматтарды берип жатат деп биз сотко тосмо арыз бердик. Тараптардын бардык доо арыздары эске алынып, соттук териштирүү жүрүп жатат", — деди Мамытов.
Кыргыз тарап Куттуу-Сай II сейрек кездешүүчү кенин иштетүү боюнча лицензиялык макулдашуунун мөөнөтүн узартууну жараксыз деп тапкан. Stans Energy компанияга келтирген 118,2 млн доллар чыгымды төлөп берсин деген москвалык соода-өнөр-жай палатасынын алдындагы арбитраждык соттун чечимин аткартуу үчүн Кыргызстандын акцияларын камакка алдырган.
2013-жылдын январында Кыргызстандын Башкы прокуратурасы 2010-2011-жылдардагы лицензиялык милдеттенмелердин аткарылбагандыгы үчүн Kutesаy Mining менен келишимдин узартылгандыгы боюнча кылмыш ишин козгогон. Кийин иш Бишкектин райондор аралык сотуна жиберилген. 19-мартта райондор аралык сот Башкы прокуратуранын койгон айыптарын туура деп таап, келишимдин узартылышын мыйзамсыз деп өкүм чыгарган.
Өз кезегинде, Kutesаy Mining Башкы прокуратуранын коюп жаткан айыптарын жүйөөсүз деп атап, 2010-2011-жылдары форс-мажордук абалдан улам белгиленген иштердин толук көлөмүн аткара алган эмес. Себеби, бул жылы апрель окуясы болуп, өлкө президенти Курманбек Бакиев качып кеткенде мамлекеттик органдардын иштери үзгүлтүккө учураган. Kutesаy Mining ошондой эле, бардык тоо-кен компаниялары Мамгеологияагенттиги менен эки жылда эч кандай иштин планын макулдашпаганын жана отчеттор кабыл алынбаганын билдиришүүдө.
Stans Energy Corp компаниясы Kutesаy Miningди 2009-жылы кенди иштетүү боюнча эки лицензиясы менен 1 млн. долларга сатып алган. Кенди алар 2029-жылга чейин иштетишмек.
