БИШКЕК, 25-дек. — Sputnik. "Азия MIX" командасынын мүчөсү Ситора Фармонова команданын жогорку лигадагы жеңишинен кийин турмушка чыгарын убадалагандай эле жакын арада ак жоолук салына турганын Sputnik Кыргызстан агенттигинин кабарчысына билдирди.
Жума күнү "Азия MIX" командасы жогорку лиганын финалында жеңишке жетип, 2016-жылдын чемпиону аталган.
"Оюндун жыйынтыгы жарыялангандан кийин мен ыйлап ийдим. Карасам, Эрма (Эрмек Кененсаров) менен Рася (Ростислав Ященко) дагы көзүнө жаш алыптыр. Негизи эле кубанычтан ыйлабаган киши калган жок", — деди Фармонова.
Анын айтымында, оюндун алдында команда мүчөлөрү уйкудан калып, күнү-түнү иштешкен.
"Репетиция маалында ар бир кыймылыбызды, атургай көз караштарыбызга чейин улам-улам кайталап даярдаганбыз. Кыскасы, болгон күчүбүздү бергенбиз", — деди Ситора.
Кавээнчи кыз мурдараак Sputnik Кыргызстан агенттигине берген маегинде команда жогорку лигада жеңишке жетишери менен турмушка чыга турганын билдирген. Өзүнүн айтымында, ал интервьюдан кийин көпчүлүктү Ситора сөзүнө турар-турбасы кызыктырып калган.
"Сиздерге маек бергенден бери мени тажатышты. Ал эми командабыз жеңгенден соң биринчи эле "эми качан тойго барабыз?" деп сурай башташты", — деди ал.
Ситора мурда сөз бергендей эле турмушка чыгарын айтты.
"Чынын айтсам, тоюмдун убакыт-сааты өзүм үчүн дагы сюрприз болот болушу керек. Өзүмө дагы тойдун боло турган жери жана убактысы боюнча айтыша элек", — деп мойнуна алды кавээнчи.
Финалдык оюнда баш байге үчүн "Азия MIX", Спарта" (Астана), "Радио Свобода" (Ярославль), Мурманск шаары жана Москва циркинин курама командалары ат салышкан.
Үч сынактын жыйынтыгы боюнча кыргызстандык команда — 10,9, "Спарта" — 10,6, Мурманск курамасы — 10,4, Москва циркинин курамасы — 10,2, "Радио Свобода" — 9,5 упай топтошкон.
