БИШКЕК, 23-окт. — Sputnik. Бишкекте өтүп жаткан V Эл аралык "Арт-Ордо" театралдык фестивалдын баш байгесин Мухтар Ауэзов атындагы Казак мамлекеттик академиялык драма театры "Кас кагым" спектакли менен ээ болду. Бул тууралуу Маданият, маалымат жана туризм министрлиги билдирди.
Маалыматка ылайык, бүгүн, 23-октябрь күнү беш күнгө созулган фестивалдын жабылуу аземи Сатылганов атындагы улуттук филармонияда өттү. Анда кароо сынакка катышуу үчүн Казакстан, Өзбекстан, Тажикстан, Татарстандан келген жана жергиликтүү театр жамааттарына сыйлыктар тапшырылды.
Натыйжада, "Мыкты режиссура" номинациясында тажикстандык режиссер Нозим Меликов "Иштибох" спектали үчүн жеңүүчү аталды.
Жантөшев атындагы Ысык-Көл облустук драма театрынын актрисасы Света Абдыкадырова "Атпагыла, өлүкмүн" спектаклиндеги ролу үчүн "Мыкты аялдын ролу" номинациясы боюнча жеңүүчү аталды.
"Мыкты эркектин ролу" байгесине Муканов атындагы Түндүк Казакстан музыкалык-драма театрынын актеру Батырбек Шамбетов "Ревизор" спектаклиндеги аткарган ролу үчүн татыды.
"Экинчи пландагы мыкты аялдын ролу" номинациясында Рыскулов атындагы Нарын облустук академиялык драма театрынын актрисасы Саадат Көгөева "Ботокөз" спектаклиндеги жараткан образы үчүн жеңиш ыйгарылды.
"Экинчи пландагы мыкты эркектин ролу" байгесине Термечиков атындагы Чүй облустук театрынын актеру Бекзат Камчыбеков "Махабатым обонум" аттуу спектаклдеги образы менен ээ болду.
Министрликтин атайын байгеси Татар театрына берилсе, Кыргызстандын театр ишмерлеринин тандоосуна Абдымомунов атындагы Кыргыз улуттук драма театрынын "Картаң айымдын келиши" спектакли ээ болду.
