БИШКЕК, 4-фев — Sputnik. Борбор калаадагы Токтогул Сатылганов атындагы филармонияда 5-февралда залкар манасчы Жусуп Мамайды эскерүү кечеси болот. Бул тууралуу биздин кабарчыга иш-чараны уюштуруп жаткан Чолпон Субакожоева билдирди.
Анын айтымында, эскерүү кечесине залкар манасчынын ашына карата уюштурулуп жатат.
"Эскерүү кечесин "Келечегиңди билгиң келсе, тарыхыңа кайрыл" деп атадык. Иш-чаранын жүрүшүндө Жусуп Мамайдын айтуусундагы эпостун 8 вариантын биздин манасчылар да айтат. Бул иш-чара атайын сахналаштырылып коюлат", — деди Субакожоева.
Аталган иш-чара КР Маданият министрлиги менен биргеликте уюштурулууда.
Улуу манасчы "Манас" эпосунун сегиз урпагына чейин айткан. Анын айтуусундагы эпос 500 миң саптан турат. Жусуп Мамай айткан "Манас" эпосунун варианты араб тамгасы менен Кытай Эл Республикасында басмадан чыккан.
Жусуп Мамайга 2014-жылы Кыргыз Республикасынын Баатыр деген наам берилген. Ал 2014-жылдын 1-июнунда 96 жашында каза болгон.
