БИШКЕК, 18-май — Sputnik. КР мамлекеттик каттоо кызматы (МКК) Түркиядан Кыргызстандын жасалма паспорту менен кармалган уйгурларга эч кандай документ берген эмес. Бул тууралуу аталган кызматтын маалымат катчысы Мелис Эржигитов Sputnik Кыргызстан агенттигине билдирди.
Белгилей кетсек, Кытайдын Үрүмчү шаарынан Стамбулга учуп келген 98 уйгур Кыргызстандын жасалма паспорту менен кармалган. Алар Стамбул аркылуу Сауд Аравияга учууга аракет кылышкан.
Эржигитов кармалган уйгурлар көрсөткөн паспорттор жасалма экенин белгилейт.
"Биздин расмий органдар тарабынан уйгур жарандарына паспорт берилген эмес. Алар Кыргызстандын жасалма паспорту менен кармалганы айтылууда. Демек алар аны башка жактан жасатышы мүмкүн", — деди ал.
Эржигитов КР паспортторун жасалмалоого жол бербөө максатында Мамлекеттик каттоо кызматы коргоо элементтери жогору болгон биометрикалык паспортторду даярдоо боюнча аракет көрүп, алар ушул жылдын төртүнчү кварталынан тарта берилерин билдирди.
Ал арада Жогорку Кеңештин депутаты Алмамбет Шыкмаматов бул окуя боюнча парламентке УКМК жетекчилигин жана Мамлекеттик каттоо кызматынын төрагасы Тайырбек Сарпашевди чакырып суроолорго жооп алууну сунуштады.
