БИШКЕК, 4-мар. — Sputnik. Премьер-министр Темир Сариев Жол кайгуул кызматы менен Кайгуул пост кызматын бириктирүү боюнча жарлыкка кол койду. Бул тууралуу өкмөттүн маалымат кызматынын жетекчиси Назира Ахмедова билдирди.
Жаңы кызмат батыш принциптери менен иштейт.
"МАИ кызматкерлери эми жолдо турушпайт. Батыш өлкөлөрүндөгү ыкма менен алардын ордуна жолдогу абалды Кайгуул кызматы көзөмөлгө алат", — деп билдирет маалымат бөлүм.
Буга чейин өкмөт башчы мамлекет тарабынан Кайгуул кызматына 100 унаа берилип, алар 24 саат бою иштей турганын айткан.
"Бул кадам жол кырсыгы катталган жерге ыкчам жетүүгө багытталган. Эми милиция кызматкерлери кайрылууларга үч мүнөттө жетип бара алышат", — дейт Сариев.
Ал кошумчалагандай шаар тургундарынын коопсуздугу үчүн баардык чаралар көрүлөт.
