Залкар жазуучу Чыңгыз Айтматов, Кыргызстан КП БКнын биринчи катчысы Турдакун Усубалиев менен Кыргыз ССРинин Жогорку Советинин президиумунун төрагасы Төрөбай Кулатовдун сүрөтү 1976-жылы Фрунзе (азыркы Бишкек) шаарында тартылган.
Ошол жылы борбор калаада Бүткүл союздук IX кинофестиваль уюштурулуп, ага бир топ атактуу режиссер, сценарист, актерлор келип, конокторду кыргыз интеллигенциясынын өкүлдөрү тосуп алган. Жыл сайын өткөрүлгөн саамалык буга чейин башка союздук республикаларда коюлуп келсе, Кыргыз ССРинде биринчи жолу уюштурулган.
Ал кезеңди СССРдин эл артисти, белгилүү режиссер Болот Шамшиев мындайча эскерет.
"Анда Фрунзе шаарында чоң майрам болгон. Эсимде, фестивалга 1500дөй адам катышып, иш-чара бир жумага жакын созулган. Кинотеатрларда бүткүл союздук республикалардын тасмалары көргөзүлүп, коноктор Германия, Франция, Англиядан келген. Мейманкалар атайын фестивалдын коноктору менен катышуучулары үчүн бошотулган. Өкмөт, партия жетекчилери жигердүү катышып, аткаминерлер башында турган. Ал учурда бийликтегилер менен маданият, адабият, кино кызматкерлери өтө жакшы мамиледе болуп иштешчү. Уюштуруу иштеринин учурунда биринчи катчы Турдакун Усубалиев "биздин республикадан кайсы тасма катышат, биз уят болуп калбайбызбы" деп калды. Катышуучулардын бири жаңы эле тартылып бүткөн менин "Ак кеме" тасмамды сунуштап, алар колдогон. Эң негизги максат кыргыз киносунун жогорку деңгээлин көргөзүү болгон. СССРдин курамындагы 15 республика, бүт киностудиялардын өкүлдөрү келген", — деди Шамшиев.
Эске сала кетсек, ошол фестивалда режиссер Болот Шамшиевдин "Ак кеме" тасмасы баш байгеге ээ болуп, кийинки жылы режиссердун өзү, сценарийин жазган Айтматов, оператору Манасбек Мусаев СССРдин мамлекеттик сыйлыгына татыган.
