БИШКЕК, 12-сен. — Sputnik. Жогорку Кеңештин депутаты Руслан Казакбаев акыркы учурда Кыргызстанда кадр тандоо маселеси көйгөй жаратып жатканын айтты.
Ал учурунда Иосиф Сталиндин "Кадрлар баарын чечет" деген сөзү Советтер Союзунда жашаган жетекчилердин, кадрлардын мээсине сиңип калганын, бирок бул түшүнүк учурда Кыргызстанда "кадрлар эч нерсе чечпейт, начальник гана чечет" дегендей сөз болуп калганын айтты. Ал Кыргызстанда кадрдык реформа болмоюнча эч кандай өзгөрүү болбой турганын белгиледи.
"Кадрлар кандай дайындалып жатканын билем, анткени мамлекеттик кадр кызматына мүчө болуп жүрдүм. Бир гана нерсени айтайын, мисалы, полиграфтан өтүп жатканда "Сен коррупцияга катышкансыңбы же катышкан эмессиңби?" деген суроо берилет. Өтүп жаткандардын 99 пайызы "жок, катышкан жокмун" деп жооп берет. Бирок полиграф "катышкан" деп көрсөтөт. Буга карабай киши жумушка алына берет", — деди депутат.
Казакбаев өкмөт саясий бир кызматка дайындалып жаткан кишилердин жасай турган реформасынын иш планын, концепциясын элге жарыялап туруу керектигин кошумчалады.
