Чүй облусунун 90 жылдыгына карата көк бөрү боюнча мелдеш башталды

БИШКЕК, 17-апр. — Sputnik. Чүй облусунун 90 жылдыгына карата спорттук мелдештер 16-апрелде башталды. Бул тууралуу Жаштар иштери, дене тарбия жана спорт боюнча мамлекеттик агенттигинин маалымат кызматы билдирди. 

Маалыматка ылайык, 16-29-апрель күндөрү Чүй облусунун Сокулук жана Ысык-Ата райондорунда көк бөрү, кунан чабыш, ат салыш, футбол, волейбол боюнча мелдештер болот.

16-апрелде Сокулук районунун Белек айылындагы ат майданда Сокулук, Жайыл, Москва жана Панфилов райондорунун көк бөрү боюнча тандалма командалары мөрөй талашты.

Жайыл районунун командасы Москва районунун улакчыларын 1:0 эсебинде, Сокулук районунун командасы Панфилов районунун командасын 10:0 эсебинде, Жайыл районунун командасы Панфилов районунун командасын 3:1 эсебинде, Сокулук районунун командасы Москва районунун командасын 8:0 эсебинде, Сокулук районунун командасы Жайыл районунун командасын 4:2 эсебинде, Панфилов районунун командасы Москва районунун улакчыларын 3:0 эсебинде утуп алышты.

17-апрелде Ысык-Ата районунун Сынташ айылында Кемин, Чүй, Аламүдүн жана Ысык-Ата райондорунун командалары көк бөрү мелдештерине катышып, күч сынашат. Эки аймактардан тандалган командалар 22-апрелде баш байге үчүн таймашка чыгат. Баш байгеге эки автоунаа коюлуп жатканын уюштуруу комитетинен маалымдашты.

Мындан сырткары жеңүүчүлөр баалуу белектер менен сыйланат.