БИШКЕК, 17-апр. — Sputnik. Милиция кызматкерлери үч күн бою самбо боюнча алты салмак категориясынан күч сынашты. Бул тууралуу Жалал-Абад ОИИБдин маалымат кызматы билдирди.
Мелдеш 2010-жылы июнь окуясында кызмат өтөп жатып каза болгон милиция кызматкерлеринин элесине арналган. Спорттук иш чара 14-16-апрель күндөрү Жалал-Абад шаарындагы "Динамо" спорт ордосунда өтүп, ага республиканын бардык аймактарындагы ички иштер органдарынын 11 курама командасы катышты.
Турнирдин жыйынтыгында ИИМдин Ош шаары жана Ош облусу боюнча башкы башкармалыгы биринчи, ички иштер министрлигинин борбордук аппараты экинчи жана Эргеш Алиев атындагы академиясы үчүнчү орунду камсыз кылышты.
Жеңүүчүлөр ИИМдин кубогу, медалдары, грамота жана Жалал-Абад ОИИБнын жетекчилиги менен Жалал-Абаддагы милициянын ардагерлери тарабынан сыйлуу белектерди алышты.
