БИШКЕК, 10-май — Sputnik. АКШ менен Израилдин Иранга каршы аскердик аракеттеринин фонунда дүйнөлүк мунай запастары рекорддук ылдамдыкта азайып жатат. Бул тууралуу Bloomberg агенттиги билдирди.
“Ирандагы согуш Перс булуңунан күйүүчү май жеткирүүгө тоскоол болуп жаткандыктан, дүйнөлүк мунай запастары рекорддук ылдамдыкта азаюуда. Натыйжада жеткирүүдөгү күтүүсүз үзгүлтүктөрдөн коргоп турган резервдер да түгөнүп баратат”, — деп айтылат маалыматта.
Маалыматта айтылгандай, мунай запастарынын тездик менен азайышы баалардын кескин өсүп кетүү жана тартыштык жаралуу коркунучун күчөтүүдө. Ормуз кысыгы аркылуу ташуулар дээрлик эки айдан бери токтоп тургандыктан, дүйнөлүк рынок бир миллиард баррелден ашык мунай жеткирүүдөн айрылды. Мунун кесепеттерин жумшартуу үчүн өкмөттөр менен өнөр жай тармагында мүмкүнчүлүктөр барган сайын азайып бара жатканы белгиленет.
Агенттик белгилегендей, мунай резервдеринин тез азайып жатышы жаңжал аяктагандан кийин да дүйнөлүк рынокту жеткирүүдөгү жаңы үзгүлтүктөргө алсыз кылып коюшу мүмкүн.
Эске салсак, 28-февралда АКШ менен Израиль Иран аймагындагы объектилерге сокку ура баштаган. Маалымат булактарынын билдиришинче, чабуулдардын кесепетинен үч миңден ашуун адам каза болгон. 8-апрелде Вашингтон менен Тегеран эки жумалык ок атышууну токтотуу режимин жарыялаган, бирок Исламабаддагы кийинки сүйлөшүүлөр жыйынтык берген эмес.
21-апрелде АКШ бир тараптуу тартипте ок атышууну токтотуу режимин сүйлөшүүлөр аяктаганга чейин узарткан. Ошол эле учурда Вашингтон Ирандын портторуна блокада киргизип, чектөөлөр келишимге жетишилгенден кийин гана алынарын билдирген. Жаңжалдын фонунда Перс булуңундагы өлкөлөрдөн мунай жана суюлтулган жаратылыш газын ташыган эң маанилүү жолдордун бири болгон Ормуз кысыгы аркылуу кеме каттамы дээрлик токтоп калды.