Бишкекте 2026-жылдын 21–24-апрель күндөрү XIV "Кыргызстан — кыска метраждуу фильмдер өлкөсү" эл аралык фестиваль өтүп, жыйынтыгы чыгарылды. Форум Борбор Азиядагы автордук кыска метраждуу кино үчүн маанилүү аянтча болуп, жаңы ысымдарды ачып келет. Быйыл башкы сыйлык Грузиядан келген «Толтурулган боштук» фильмине ыйгарылды. "Эң мыкты режиссура" сыйлыгын Азербайжандын "Ориондон сүйүү менен" тасмасы алды. Калыстар тобунун атайын сыйлыгы Тажикстандын "Лукхтак" тасмасына берилди. Кыргызстандык "Балык" фильми көрүүчүлөрдүн симпатиясына ээ болду. Ал эми Улуттук конкурста "Эң мыкты фильм" сыйлыгын режиссёр Нөөкөр Алтайдын "Араба" тасмасы алды. Фестиваль кыска метраждуу кинонун өнүгүп жатканын жана жаш авторлорго жаңы мүмкүнчүлүктөр ачылып жатканын дагы бир жолу тастыктады.
Быйыл эл аралык конкурсунун жеңүүчүлөрүн Тажикстандык анимация режиссёру Бахтиёр Кахаров (төрагасы), Казакстандан Асия Байгожина, Кыргызстандан Эл артисти Акылбек Мураталиев, Өзбекстандан Хилол Насимов жана Россиядан продюсер-режиссёр Дмитрий Пиркулов кирген өкүлчүлүк калыстар тобу аныктады. Бул курам фестивалдын аймактык маанисин жана постсоветтик мейкиндиктеги маданий диалогдун борбору экенин дагы бир жолу көрсөттү.
Буга чейин уюштуруучулар "Стоп кадр" программасында фестивалга дүйнөнүн ар тарабынан 900дөн ашык арыз келип түшкөнүн, алардын көбү Россиядан келип, Армениялык фильмдер өзгөчө көңүл бурдурганын айткан.