Дээрлик 30 жыл милицияда эмгектенген айым учурдагы балдардын үч көйгөйүн айтты. Биринчиси, ата-энеси менен баарлашуу жок, көңүл бурулбаган балдар бар. Алар көбүнчө кылмыш жасап, туура эмес жолго түшүп кетишет. Экинчиси — балдарга карата зордук-зомбулуктун барган сайын көбөйүп жатканы, ал эми үчүнчү көйгөй, учурдун эң талуу маселеси — бул балдардын үйдөн качууну адатка айланткандыгы. Адис бул көйгөйлөр ата-эне балага кылдат көңүл бурбагандан келип чыгарын түшүндүрдү. Айтымында, үйдөн көңүл албаган бала аны көчөдөн издеп баштайт.
Адылова инспектор болуп иштеп жүргөн оор жылдарга да токтолду. 1995-2000-жылдардагы элдин кыйын турмушу, анда оорчулукту көргөн балдар тууралуу да баяндады.
Андан ары маектеш кесиби аркылуу өз уулундай болуп калган балдарды тапканын да айтып берди. Мисалы, 1994-жылы үй-бүлөдөгү оор шарттан улам уурулук, тоноо, дагы башка кылмыштарга аралашып жүрүп, шарттуу түрдө кесилген баланы атайын-кесиптик лицейге окууга киргизген. Бул жол баланы оңдоп кеткенин кийин сантехник болуп иштеп жүргөндө көргөн. Ушул сыяктуу дагы башка балдар менен эне-баладай катышып калганын да жашырган жок.