БИШКЕК, 4-май — Sputnik. Бишкекте 18 жашка чейинкилер арасында хоккей боюнча Азия кубогу жыйынтыкталды. Бул тууралуу Дене тарбия жана спорт мамлекеттик агенттигинен билдиришти.
3-майда Nomad Arena муз аянтчасында өткөн мелдештин финалында кыргызстандыктар Өзбекстандын командасына 2:3 эсебинде утулуп калышкан. Ал эми III орунду Монголиядан келген курама алды.
Эл аралык турнирге Кыргызстан, Өзбекстан, Кытай, Индонезия, Монголия жана Индия мамлекеттеринин командалары катышкан. Мелдештер курч атаандаштыкта өтүп, жаш хоккейчилердин жогорку деңгээлдеги даярдыгын көрсөткөнү белгиленди.