Президент Садыр Жапаровго жана Того Республикасынын министрлер кеңешинин төрагасы Фор Эссозимна Гнассингбеге бүгүн, 30-апрелде кыргыз элинин салттуу ат оюндары жана мелдештери көрсөтүлдү. Иш-чара Ысык-Көл облусунун Бактуу-Долоноту айылындагы ипподромдо өттү. Ипподромдун кире беришинде конокторду добулбастардын добушу астында жоокерлер жана улуттук кийимчен кыздар тосуп алышты. Программанын алкагында “Намыс” жана “Сары-Өзөн” командаларынын катышуусунда көк бөрү боюнча көрсөтмөлүү оюндар болуп өттү. Андан ары “Манас” эпосунда сүрөттөлгөн байыркы “Салбуурун” оюнунун элементтери, анын ичинде алгыр куштар жана тайгандар менен аңчылык кылуу, ат үстүндө жаа атуу жана “Кыз куумай” улуттук оюну көрсөтүлдү. Иш-чара каскадёрлор тобунун жорго салыш, найза менен атчан чабыш жана башка ат жалындагы өнөрлөрүн көрсөтүүсү менен аяктады.
Быйыл өлкөдө акыркы коңгуроо салтанаты 29-майда өтө турганын Агартуу министрлиги эске салды. Ведомствонун маалыматында аземге карата бүтүрүүчүлөрдөн жана ата-энелерден акча чогултууга тыюу салынганы айтылат. Ошондой эле мектептен тышкары кошумча иш-чараларды уюштурууга, фейерверк, жарылуучу же кооптуу техникалык каражаттарды колдонууга уруксат берилбейт. Адатта акыркы коңгуроо 25-майда белгиленет, бирок бул жолу жазгы каникулдар узартылгандыктан жылды.
Кыргызстанда анализдерди туура эмес чыгарып берген лабораторияларды жабуу сунушталды. Демилге депутат Азамжан Жалиловго таандык. Эл өкүлү Укук бузуулар кодексине өзгөртүү киргизүүнү демилгелеп жатат. Мыйзам долбооруна ылайык:медициналык стандарттардын бузулушунан улам анализдерди туура эмес чыгарып бергени үчүн жеке жактарга 10 миң сом, юридикалык жактарга 35 миң сом айып салуу; диагнозу коюлган лабораториялык изилдөөлөрдүн ката жыйынтыгын жашырган жеке жактарга 20 миң сом, юридикалык жактарга 65 миң сом айып салуу. Долбоордо эгер бул аракеттер жыл ичинде кайталанса, айып пул 50/200 миң сомго чейин көтөрүлүп, лицензия сот аркылуу жокко чыгарылары айтылган.
Ирандын президенти Масуд Пезешкиан АКШ деңиз каттамдарына жасаган чектөөлөрү менен бүтүндөй дүйнөгө кооптуулук жаратууда деп мүнөздөдү. Бул туурасында РИА Новости жазды. Буга чейин, 29-апрелде, Ак үйдүн башчысы Дональд Трамп Тегеран өзөктүк программасынан толук баш тартмайынча деңиз блокадасын токтотпой турганын билдирген. Анын пикиринде, мындай кысым аскердик чабуулдарга караганда алда канча натыйжалуу. Ал эми Пезешкиан Ирандын каршылаштары кармашуунун ыкмасын өзгөрткөнүн, ачык согуштун ордуна деңиз соодасын чектөө жана экономикалык курчоого алуу аркылуу кысым көрсөтө баштаганын белгиледи. "Деңизди курчоого алуу же кандайдыр бир чектөөлөрдү киргизүү аракеттери — эл аралык укуктарды бузгандык. Бул аймактагы элдин кызыкчылыгына гана эмес, бүтүндөй дүйнөнүн тынчтыгы менен туруктуулугуна коркунуч келтирет. Мындай аракеттер адатта ордунан чыкпайт", — деген Пезешкиан Ирандагы "Перс булуңунун күнүнө" карата сүйлөгөн сөзүндө.Иран президентинин маалымат кызматы билдиргендей, ал Перс булуңу кимдир бирөөнүн өзү билемдик менен эркин таңуулай турган жер эмес. Тескерисинче, эл аралык өз ара кызматташуу системасынын ажырагыс бөлүгү экенин кошумчалаган.