БИШКЕК, 28-апр. — Sputnik. Былтыр алимент төлөөдөн качкан 1 205 жаран издөөдө жүрөт. Акыйкатчы институту алимент өндүрүү боюнча кайрылгандардын саны эки эсеге өскөнүн билдирди.
Омбудсмен Жамиля Жаманбаева мамлекеттик органдардын алимент өндүрүү көйгөйүнө көңүл буруп, балдардын укугун коргоо боюнча комплекстүү чараларды көрүүгө чакырды. Ал учурда иштеп жаткан алимент өндүрүү механизми жетиштүү натыйжа бербей, жарандар ата-энелик жоопкерчиликтен качып, баланын укуктары толук корголбой, маселе чоң социалдык көйгөйгө айланып бара жатканын белгиледи.
"Алимент өндүрүү боюнча кайрылгандардын басымдуу бөлүгү аялдар. 2025-жылы 823 адам кайрылган, алардын ичинен 49у эркек, ал эми 774ү аялдар. Соттун чечими чыкканы менен алардын басымдуу бөлүгү ишке ашпай жатат. Бул алиментке байланыштуу негизги көйгөйлөрдүн бири. Акыйкатчы институтуна кайрылган арыз ээлеринин бардыгынын колунда сот чечими бар, бирок аткарылган эмес", — деп айтылат маалыматта.
Сот аткаруучулар кызматынын маалыматына ылайык, 2024-жылы 36 613 чечим боюнча 4 152синен гана алимент өндүрүлгөн. 2025-жылдын аягында баласына акча бөлдүрүү боюнча иштердин саны 60 720га жеткен. Алименттен качуу үчүн карызкор жасалма "жумушсуз" болуп, чыныгы кирешесин жашырып, мүлкүн туугандарына каттатат же өзү чет өлкөгө чыгып кетет.
Омбудсмен жогоруда көрсөтүлгөн кемчиликтердин негизинде өкмөткө бир катар сунуштарды жөнөттү.