БИШКЕК, 21-апр. — Sputnik. ЕАЭБ өлкөлөрү статистиканы санариптик трансформациялоодо жасалма интеллектиге басым жасап жатышканын Евразия экономикалык комиссиясынын интеграция жана макроэкономика боюнча министри Данияр Иманалиев билдирди.
Анын төрагалыгы алдында ЕЭКтин башкы кеңсесинде эл аралык семинар өттү. Ага биримдиктин улуттук статистикалык кызматтарынын, КМШнын статистикалык комитетинин, БУУнун Европа боюнча экономикалык комиссиясынын өкүлдөрү жана маалымат таануу, расмий статистика боюнча алдыңкы эксперттер катышты.
Алар жасалма интеллектини талдоого жана системалардын чоң маалыматтар менен иштөөгө даярдыгын баалоого өзгөчө көңүл бурушту.
Мындан тышкары, маалыматтын сапатын камсыз кылууу, алгоритмдерди этикалык жактан жөнгө салуу маселелери, ошондой эле ЕАЭБ өлкөлөрүндөгү экономикалык ишмердүүлүктүн түрлөрүн классификациялоо, аналитикалык процесстерди автоматташтыруу жана маалыматтарды санариптик текшерүү боюнча пилоттук долбоорлор талкууга алынды.
"Жасалма интеллект менен күчөтүлгөн статистика — бул жөн гана технология эмес, мамлекеттик башкаруунун сапатынын жаңы стандарты, чечимдерди кабыл алуунун негизи жана жыйынтыгы жарандардын жыргалчылыгын жогорулатуу куралы болуп саналат, — деп белгиледи ЕЭК министри.
Анын айтымында, Евразия экономикалык биримдигинин статистикасын мындан ары өнүктүрүү жоопкерчиликтүү ЖИнин бирдиктүү инфраструктурасын түзүүнү, ачык маалымат экосистемасына өтүүнү, ошондой эле кадрдык потенциалга инвестиция салууну талап кылат.