БИШКЕК, 20-апр. — Sputnik. Жакынкы Чыгыштагы жаңжал ЖККУ аймагына да таасир этет. Бул тууралуу Россия ТИМинин жетекчиси Сергей Лавров ЖККУнун Парламенттик ассамблея кеңешинин жыйынында билдирди.
Министр Перс булуңундагы кризистин, Ливандагы тирешүүнүн, Сирияга каршы согуштун күчөшү жана аны кыйратууга жасалган аракеттин, Газадагы палестин эли менен Иордан дарыясынын сол жээгиндеги апааттын запкысын ЖККУга мүчө мамлекеттер да тартат деген пикирде.
"Биздин регионду кыйгап өтпөйт. Жаңы эле Антальядагы эл аралык дипломатиялык конференциядан келдим. Түркия президенти Режеп Тайип Эрдоган да, башка катышуучулар да Перс булуңундагы кризистин кесепети Араб жарым аралындагы мамлекеттерге эле эмес, Каспийге, Түштүк Кавказга жана Борбор Азияга да тиерин айтып жатышат", — деди Лавров.
РФ ТИМ жетекчиси дагы эмнелерге токтолду:
Евразиядагы коопсуздукка коркунуч күчөп жатат, бул ЖККУдан кошумча аракеттерди талап кылат;
уюмдун моралдык лидерлиги ушу тапта өтө зарыл;
ЖККУ эл аралык укуктан четтебей, аны бузууга аракет кылгандарга каршылык көрсөтөт;
ЖККУнун өзөгүн өз ара сый-урмат, ынак коңшулук түзөт, НАТО менен ЕБден айырмаланып үстөмдүк жасоо аракети жок;
уюм ОБСЕ менен токтоп калган алаканы жандантууга даяр;
Россия ЖККУнун төрагасы катары аскердик авиация менен абадан коргонуу системасын күчөтүүгө өзгөчө көңүл бурат.