БИШКЕК, 15-апр. — Sputnik. Европа Ормуз кысыгындагы кыймылды калыбына келтирүү үчүн АКШ кирбеген коалиция түзүүнү көздөп жатат. Бул тууралуу The Wall Street Journal жазды.
"Европа мамлекеттери Ормуз кысыгы аркылуу жүргөн кемелердин каттамын жандантуу үчүн ири коалиция түзүү ниетинде. Мында мина чалгындоочу жана башка аскердик кемелер тууралуу да сөз болуп жатат. Демилге согуш бүткөндөн кийин ишке ашырылмакчы, коалицияга АКШны киргизбөө талкууланууда", — деп жазылат макалада.
Германиянын жогорку кызматтагы аткаминеринин айтымында, ага аскердик кийлигишүүдөн баш тартып келген Берлин кириши ыктымал.
Деген менен европалыктардын арасында бир өңчөй пикир жок. Мисалы, франциялык дипломаттар бул сыяктуу операцияга АКШнын катышуусу Иран үчүн кабыл алынгыс болуп саналарын айтышса, британиялыктар америкалыктардын кошулбай калышы Дональд Трамптын чоң нааразычылыгын жаратып, коалициянын эркиндигин чектеп коет деген пикирде.
Эскерте кетсек, буга чейин Британия менен Франция Ормуз кысыгын бөгөттөөгө каршы чыгышкан. Ак үйдүн ээси дүйшөмбү күнү кысык жабылып, америкалык аскерлер андан өтүүгө аракет кылган бардык кемелерди токтоторун айткан эле. Мындан тышкары, ал кысыктан өткөнү үчүн Иранга акча төлөгөн танкерлерди да аныктап, кармоого тапшырма берген.
Тегеран эки жумалык элдешүү жарыяланган соң өткөн аптада айрым шарттар менен Ормузду ачкан. Кастарын тиккен мамлекеттер үчүн кысык жабык бойдон турат.