БИШКЕК, 14-апр. — Sputnik. Словения НАТОдон чыгуу боюнча референдум өткөрүү ниетинде болуп жатканын өлкөнүн Мамлекеттик жыйынынын төрагасы Зоран Стеванович айтты. Бул туурасында РИА Новости жазды.
"Башкалардын аскердик жана дипломатиялык чыр-чатактарга кийлигишкенине кескин каршыбыз, мындан Словения пайда таппайт. Ошол эле учурда биз НАТОдон чыгуу боюнча референдум өткөрөбүз деп элге убада бергенбиз. Эми жалпы элдик добуш берүү болот", — деп парламенттин спикери Словениянын телерадиосуна билдирген.
Стеванович Любляна көз карандысыз саясат жүргүзүп, бардык өлкөлөр, биринчи кезекте улуу державалар менен кызматташуусу керектигин, бирок бул кызматташтык баш ийүү дегенди билдирбеши зарыл деген пикирин айткан.
Жакынкы Чыгышта азыр кырдаал чайпалып турган чакта НАТО кризиске кептелди. АКШ президенти Дональд Трамп НАТОну кагаз жүзүндөгү жолборс деп атап, АКШнын Тегеран менен тирешүүсүндө көмөктөшпөгөнү үчүн сындап жатат. Германия менен Франция да Ормуз кысыгын ачуу боюнча операцияга катышуудан баш тарткан. Евродипломатиянын башчысы Кая Каллас ЕБ мамлекеттери ал жакка флот жөнөтүүгө даяр эместигин билдирген.
Пентагондун башчысы Пит Хегсеттин айтымында, Трамп НАТОнун маселесин Иран менен чатак аягына чыккандан кийин чечет.