БИШКЕК, 13-апр. — Sputnik. АКШнын президенти Дональд Трамптын Ормуз кысыгындагы кыймылды чектейм деген билдирүүсүнөн кийин мунайдын дүйнөдөгү баасы сегиз пайызга кымбаттап кетти.
Соода жүргөн платформаларда Brent маркасынын бир баррели 102 долларга чыкты.
11-апрелде Пакистанда Америка менен Ирандын делегацияларынын диалогу ийгиликсиз аяктады. Эртеси АКШнын вице-президенти Жей Ди Вэнс эки тарап кепке келе албай койгондуктарын айткан. Ага улай эле Трамп Ормуз аркылуу өтүүгө аракет кылган бардык кемелерди тосо турганын жар салган. Анын айтымында, Кошмо Штаттар жакын арада бул деңиз жолун жабат, ал эми Улуу Британия жана дагы бир нече өлкө миналардан тазалоо үчүн атайын техникаларды жөнөтөт.
Бирок бир аздан кийин Лондон кысыкты тосууга катышуудан баш тартканы белгилүү болду. Мындай маалыматты Британиянын PA агенттиги өзүнүн маалымат булактарына таянып таратты.
"Ормуз кысыгы үчүн эч кандай бажы төлөмдөрү алынбашы керек. Биз кемелердин ары-бери эркин катташын камсыздап, коргоо максатында кеңири коалиция түзүү үчүн Франция жана башка өнөктөштөр менен ыкчам иштеп жатабыз", — деп билдирди Даунинг-стриттин маалымат катчысы.
Ошол эле учурда Ирандын Press TV каналы Ирандын Ислам революциясынын сакчылар корпусу эгер аскердик кемелер Ормуз кысыгына жакындай турган болсо, катуу жооп кайтарыларын эскерткенин билдирди.