БИШКЕК, 9-апр. — Sputnik. АКШ Ирандан өзөктүк материалдарды тапшырып берүүнү талап кылат. Бул туурасында Иран боюнча Пакистанда өтчү сүйлөшүүдө америкалык делегацияны жетектеп бара турган Кошмо Штаттардын вице-президенти Жей Ди Вэнс айтканын РИА Новости жазды.
"Президент эмне деди: Ирандын өзөктүк курал жасаганын каалабайбыз. Уранын бизге өткөрүп бериши керек. Муну сүйлөшүүлөрдө да талап кылабыз", — деген Вэнс.
Ал Ирандын өзөктүк куралдардан баш тартышы АКШнын аларга карата санкцияларын жумшартат деген оюн билдирген.
"Президент ( Дональд Трамп - ред.) санкцияларды азайтуу, экономикалык кызматташуу жана дагы ушул сындуу маселелер туурасында айтты. Эгерде Иран өзөктүк куралды иштеп чыгуу сыяктуу кадамдарын токтотом деп бекем убада берсе, булар ишке ашат", — деген вице-президент.
Ал, мындан сырткары, төмөнкүлөргө токтолду:
Ормуз кысыгы аркылуу кемелер эркин өтпөсө АКШ Иран менен түзүлгөн келишимдин шарттарын аткарбайт;
Иранды сүйлөшүүлөргө олуттуу мамиле жасоого чакырам. Алардан бул кадамга бара турган ынтаасын көрүп жатабыз. Анткен менен айрым сес көрсөтүүлөр да байкалууда, бирок жалпысынан биздин позициябыз жакшы;
Ливан туурасында: мен муну чынында эле өз ара түшүнбөстүк деп эсептейм. Бирок биз да, израилдиктер да бул (Ливан – ред.) атышууну токтотуу келишиминин бир бөлүгү болот деп билдирген эмеспиз;
Израиль Вашингтон менен Тегерандын макулдашып кепке келиши үчүн Ливанга сокку урууну чектеп турууга макулдугун берди.
Ак үйдүн маалымат катчысы Каролин Левитт АКШнын сүйлөшүү жүргүзчү командасы Пакистанга 11-апрелге чейин барарын билдирди.
Эске салсак, Иран ТИМинин өкүлү Исмаил Багаи Израилдин Ливанга кечээки кол салуусу Вашингтон менен Тегерандын кепке келген макулдашуусун бузгандык болуп саналарын айткан.
Трамп 8-апрелге караган түнү Иран менен согуш эки аптага токтотуларын жар салган. Иран ТИМ башчысы Аббас Аракчи андан көп өтпөй эле Ормуз кысыгын ача тургандыктарын билдирген.