БИШКЕК, 1-апр. — Sputnik. Бириккен Араб Эмирликтери АКШ менен анын союздаштарына аскер күчүн колдонуу менен Ормуз кысыгын ачууга жардам берүүгө даярданып жатат. Бул тууралуу арабиялык аткаминерлерге таянуу менен Wall Street Journal жазды.
Гезиттин маалыматына караганда, БАЭ аталган аракетке уруксат бере турган БУУнун Коопсуздук кеңешинин резолюциясынын кабыл алынып калышына жан үрөөдө. Эмирликтердин өкүлү дипломаттар АКШ менен Европа жана Азия мамлекеттерин кысыкты күч менен ачтыра турган коалиция түзүүгө чакырышканын билдирди.
Анын айтымында, БАЭ кысыктын коопсуздугун камсыздоодо аскерий кийлигишүү жолдорун карап жатат, мындан тышкары, аны минадан тазалоого киришмекчи.
Буга чейин РФ президенти Владимир Путин телефондон БАЭнин башчысы Мухаммед бен Заид Аль-Нахайян менен байланышып, Жакынкы Чыгыштагы абалды талкуулаган.
Белгилей кетсек, АКШ менен Израиль Иранга каршы аскердик операциясын 28-февралда баштаган. Ага чейин Ак үйдүн ээси ислам республикасынан өзөктүк куралдан биротоло баш тарткан келишим түзүүнү талап кылган. Болбосо былтыркы жайдагыдан да күчтүү чабуул кое турганын айтып коркуткан.
Жалпы абал оорлошуп, Ормуз кысыгынын жабылышын шарттады. Бул Перс булуңунан дүйнөлүк рынокко мунай жана суюлтулган газ ташый турган орчундуу маршрут болчу, анын үлүшүнө жалпы мунайдын 20 пайызы туура келет. Нытайжада көп жерде отундун баасы асмандап кетти.