БИШКЕК, 31-мар. — Sputnik. Владимир Зеленскийдин айлыгы 28 миң гривендин (болжол менен 52 миң рубль) тегерегинде. Бул тууралуу РИА Новости анын расмий сайтында жарыяланган декларациянын маалыматтарында көрсөтүлгөнүн жазды.
Документке ылайык, Зеленский былтыркы негизги кирешесин президенттик айлыктан, банктык аманаттардан түшкөн пайыздардан, кыймылсыз мүлктү ижарага берүүдөн тапкан. Ал эми жалпы кирешеси болжол менен жети миллион гривенди (болжол менен 13 миллион рубль) түзгөн.
Ошол эле учурда Зеленскийдин акчалай активдери дээрлик өзгөргөн эмес. Декларацияда Швейцариянын банкында жайгаштырылган 342 631 евросу, 595 000 доллары, ошондой эле башка банктык эсептердеги гривен, доллар жана евро түрүндөгү акчалар көрсөтүлгөн.
Украинадагы коррупция боюнча чуу
10-ноябрда өлкөнүн Коррупцияга каршы улуттук бюросу (НАБУ) энергетика тармагындагы азыркы жана мурдагы аткаминерлер, көрүнүктүү бизнесмен жана энергетика тармагындагы коррупцияга аралашкан башка адамдар катышкан кылмыштуу уюмдун ишмердүүлүгүн ачыктап, документтештиргени маалымдалган.
Рада депутаты Ярослав Железняк бюро ошол кезде энергетика министри болуп турган Галущенко менен "Энергоатом" компаниясынын кеңсеси тинтүүгө алынганын билдирген. "Украинская правда" НАБУ кызматкерлери ишкер жана Зеленскийдин жакын адамы Тимур Мендичтин үйүнө да келишкенин, бирок бизнесмен өлкөдөн чыгып кетүүгө үлгүргөнүн кабарлаган.
Кийин ведомство энергетика тармагындагы коррупция боюнча иштин аудиожазууларын жарыялаган. Анда Тенор, Рокет жана Карлсон деген адамдар бар экени айтылган. Железняктын билдирүүсү боюнча, Карлсон — бул Миндич, Тенор — "Энергоатомдун" өкүлү Дмитрий Басов, ал эми Рокет — мурдагы энергетика министри Галущенконун кеңешчиси Игорь Миронюк.
НАБУ 11-ноябрда энергетика тармагындагы коррупцияга катыштыгы бар делген кылмыштуу уюмдун жети мүчөсүнө, анын ичинде Миндичке айып таккан. Ишке Украинанын мурдагы вице-премьери Алексей Чернышов да катышканы айтылат.
Жогорку Рада 19-ноябрда кылмыштуу иште аты аталган Галущенкону юстиция министри, ал эми Светлана Гринчукту энергетика министри кызматынан алган.
Зеленский Миндич менен анын башкы финансисти Александр Цукерманга карата санкция киргизген.
Депутат Ирина Геращенко бул окуялардан улам Киев Батыштын колдоосунан кол жууй турганын айткан.