БИШКЕК, 27-мар. — Sputnik. Украинага согуштук аракеттерди жүргүзүүгө каражат июнь айына чейин гана жетиши мүмкүн. Бул тууралуу Bloomberg жазды.
Маалыматка караганда, Венгрия менен Словакиянын 90 миллиард евро көлөмүндөгү Европа биримдигинин насыясына вето коюшу жана Эл аралык валюта фондунун акыркы жардам пакети айланасындагы талаш-тартыш Киев режиминин маневр жасоо мүмкүнчүлүгүн кыйла кыскартты.
"Ички жана чет элдик расмий адамдар тарабынан берилген баалоолорго ылайык, Киевде чыгымдарды жабуу үчүн каражат июнь айына чейин гана жетет. Бул маалыматты алар өз аты-жөнүн атабоо шарты менен билдиришти", — деп айтылат макалада.
Bloomberg ошол эле учурда Москва Жакынкы Чыгыштагы жаңжалдан улам мунай баасынын кескин өсүшүнөн пайда көрүп жатканын белгиледи. Ал арада АКШ менен Израилдин Иранга каршы операциясы Украина боюнча сүйлөшүүлөрдү экинчи планга жылдырды.
Братислава менен Будапешт "Дружба" мунай кууруна байланышкан жагдайдан улам Европа биримдигинин Киевге бериле турган насыясын бөгөттөп жатат. Январь айынын аягында бул куур аркылуу күйүүчү майды айдоо токтотулган. Петер Сийяртонун айтымында, Украина ушундай жол менен өлкөдөгү апрель айындагы парламенттик шайлоого таасир этүүгө аракет кылууда.
Виктор Орбан өз позициясы өзгөрбөй турганын эскертти. Ал Киев Брюсселден каражат алгысы келсе, мунай жеткирүүнү калыбына келтириши керек деген талапты коюуда.