Конференцияны Россиянын Кыргызстандагы элчиси Сергей Вакунов ачты. Ал өлкөлөрдүн ортосундагы маданий жана гуманитардык байланыштарды чыңдоонун маанисин белгиледи.
"Мамлекеттердин, айрыкча көп улуттуу жана көп конфессиялуу Россия менен Кыргызстан сыяктуу өлкөлөрдүн туруктуулугунун, көз карандысыздыгынын негизин элдердин биримдиги түзөт", — деди Вакунов.
Катышуучулар гуманитардык кызматташтыкты өнүктүрүү, мекендештерди колдоо, улуттар аралык ынтымакты чыңдоо жана маданий байланыштарды бекемдөө маселелерин талкуулашты. Жыйналгандарга ошондой эле "Кыргызстан элинин ассамблеясы" ассоциациясынын кеңешинин төрагасы Рахман Медер кайрылуу жасады.
"Кыргызстан менен Россияны жөн гана дипломатия эмес, терең тарыхый, маданий жана адамдык алака байланыштырып турат. Мамилелердин тарыхы өз ара колдоого жана жалпы жолго негизделген. Анын ичинде Улуу Ата Мекендик согуш өзгөчө орунду ээлейт: миңдеген кыргызстандык башка элдер менен катар Мекенди коргоп, Кыргызстан ишенимдүү тыл болуп кызмат кылган", — деди ал.
Иш-чарага ошондой эле Россотрудничествонун Кыргызстандагы өкүлчүлүгүнүн жетекчиси Альберт Зульхарнеев, Жогорку Кеңештин депутаты Темирлан Айтиев, Бишкек жана Кыргызстан епискобу Савватий жана башкалар катышты.
Конференция Кыргызстан менен Россиянын гуманитардык жана маданий тармактардагы мындан аркы өз ара кызматташуусунун келечегин талкуулоо жана тажрыйба алмашуу үчүн аянтча болду.