БИШКЕК, 26-мар. — Sputnuk. Жогорку Кеңештин төрагасы Марлен Маматалиев жетектеген расмий делегация иш сапар менен Россияга барды. Бул туурасында парламенттин маалымат кызматынан кабарлашты.
Дегелациянын курамында депутаттардан сырткары санариптик өнүктүрүү жана инновациялык технологиялар министринин биринчи орун басары Нурсултан Кубанов менен "Кыргыз тест" мамлекеттик мекемесинин директору Батма Топоева-Ставинская болду.
Төрага Москва шаарында жайгашкан Валерий Орлов атындагы "Марьина Роща" мектебинде болгон. Делегацияга эмгек мигранттарынын балдарын жалпы билим берүү класстарына кабыл алуу үчүн өткөрүлүүчү тестирлөөнүн тартиби тууралуу маалымат беришкен. Депутаттар тапшырмалардын татаалдыгына көңүл буруп, аларды мүмкүн болушунча жөнөкөйлөтүү боюнча сунуштарын билдиришти. Ошондой эле жолугушуунун катышуучулары тесттин мазмунун жана деңгээлин баалоо максатында өздөрү да өтүп көрүштү.
"Чет өлкөлөрдө жүргөн мекендештерибиздин балдары үчүн билим алууга жеткиликтүүлүк маселеси биз үчүн абдан маанилүү. Тесттен өткөрүүнүн шарттары түшүнүктүү, адилеттүү болуп, башка тилдик чөйрөдөн келген балдардын өзгөчөлүктөрү эске алынышы кажет", — деген Маматалиев.
"Кыргыз тест" мамлекеттик мекемесинин директору Батма Топоева-Ставинская мындай процедуралар билим алууга тоскоолдук жаратпашы керектигин эске салган.
"Биз билим деңгээлин баалоонун зарылдыгын түшүнөбүз. Бирок мындай процедуралар билим алууга тоскоолдук жаратпашы керек. Ар бир баланын жаңы чөйрөгө көнүп, толук кандуу билим алуусуна ыңгайлуу шарттарды түзүү жалпыбыздын милдетибиз", — деген.
Андан соң Кыргызстандын көргөзмө соода борборунда Маматалиев делегация мүчөлөрү менен бирге кыргыз диаспорасынын өкүлдөрү жана эмгек мигранттары менен жолукту. Баарлашуунун жүрүшүндө мекендештерди тынчсыздандырган актуалдуу маселелер көтөрүлүп, тиешелүү түшүндүрмөлөр жана жооптор берилди. Төрага мамлекет кайсы жерде болбосун өз жарандары менен дайыма бирге экендигин жана өткөрүлгөн бардык маселелер көзөмөлгө алына тургандыгын белгилеген.
Ал эми бүгүн спикер РФтин Федералдык жыйынынын Мамдумасынын төрагасы Вячеслав Володин жана Федерация кеңешинин төрайымы Валентина Матвиенко менен эки тараптуу сүйлөшүүлөрдү жүргүзөрү күтүлүүдө.