БИШКЕК, 26-мар. — Sputnik. Заманбап медицина ооруларды кабылдап кете электе аныктоого, алдын алууга жана тобокелдиктин себептерин издөөгө багыт алып бара жатат, муну баштапкы жана профилактикалык фармакология деп атайбыз. Бул тууралуу Россиядагы Алмазов атындагы медициналык улуттук борбордун башкы директору, академик, профессор Евгений Шляхто ШКУга мүчө мамлекеттердин ооруканалар альянсынын Бишкектеги VIII конференциясында билдирди.
Анын айтымында, Россиянын саламаттыкты сактоо системасында учурда көп оорулардын белгилерин алдын ала аныктаган биомаркерлерди издөө колго аларлык мисалдардын бири.
"Алдын алууга мүмкүн болбогон өлүмдүн себептери болжол менен 66 пайызды, ал эми алдын алууга мүмкүн болгон себептер 34 пайызды түзөрүн билебиз. Учурда Россиядагы саламаттыкты сактоону өнүктүрүүнүн бүтүндөй заманбап парадигмасы бейтаптардын жашоосунда өлүмдү азайтуунун жолдорун табуу максатында жаңы улуттук долбоорлорго багытталган. Булар — алдын алуу жана стационардык жардамдан баштап калыбына келтирүүгө жана диспансердик байкоого чейинки нерселер. Биз кайсы илдеттер жана кайсы куракта эң маанилүү экенин түшүнөбүз, ошондой эле өлүмдүн себептерин иликтейбиз. Анда жаш кези да эске алынат. Орто куракта жүрөктүн ишемиялык оорусу кошулат, андан кийин улгайганда ага кошумча дагы башка оорулар пайда болот. Албетте, жүрөк стрессин көрсөткөн биомаркерлерди табуу биз үчүн абдан маанилүү", — деди ал.
ШКУга мүчө мамлекеттердин ооруканалар альянсынын VIII конференциясы Кыргызcтандын аталган уюмга төрагалыгынын алкагында өтүүдө жана ага мүчө өлкөлөрдүн саламаттык сактоо министрлеринин жолугушуусуна карата уюштурулган.
Форум төрагалыктын "ШКУга 25 жыл: туруктуу тынчтыкка жана гүлдөп-өнүгүүгө бирге" деген урааны менен болууда. Анын алкагында Россия медицинасынын күндөрү да өткөрүлөт. Иш-чараны Кыргызстандын Саламаттык сактоо министрлиги жана академик Мирсаид Миррахимов атындагы Улуттук кардиология жана терапия борбору уюштурууда.