Жогорку Кеңештин депутаты Токтобүбү Ашымбаева Кыргызстанда балдардын азыктарын жарнама кылууга тыюу салыш керек деген сунушту киргизди. Маалымат парламенттин сайтына жарыяланган. Ага эненин сүтүн алмаштыра турган азыктар, бөтөлкө, упчу жана тамактандыра турган башка продукциялар кирип калышы мүмкүн. Ашымбаева беш жашка чейинки бөбөктөрдүн тамактануусу бузулганы боюнча маселе курч турганын, бул нерсе кичинекейлердин ден соолугуна терс таасирин тийгизерин айткан. Парламентарий эң жакшысы жана чыгым аз кете турган жол — баланы эмизүү экенин белгилеп, бөбөктөрдүн тамагын жарнамалоо жогорудагы көйгөйгө алып келүүдө деген оюн билдирген. Былтыр май айында ал кездеги депутат Айсулуу Мамашова ушул сындуу мыйзам сунуштап, алты айга чейинки бөбөктөргө берилчү азыктарды рекламалоону чектөө зарылдыгын айткан эле.
Кыргызстанда жолдо жаңжалдашкан айдоочуларга айып пул салуу сунушталууда. Жогорку Кеңештин депутаты Бактияр Калпаев демилгелеген мыйзам долбоору 19-мартта коомдук талкууга коюлду. Документке ылайык, Укук бузуулар кодексине толуктоо киргизилет. Анда жолдо мушташкан же агрессивдүү аракеттерди жасаган айдоочуларга 10 миң сом айып салуу каралууда. Эгер бир жыл ичинде кайра кайталанса, айдоочулук укугунан жарым жылга ажыратылат. Демилгечи бул мыйзам долбоору жол кыймылы коопсуздугун жогорулатуу жана айдоочулардын жүрүм-турум маданиятын жакшыртуу максатында иштелип чыкканын белгилеген.
Айыл чарба министрлиги жугуштуу оору жайылган өлкөлөрдөн мал жана мал чарба продукцияларын импорттоого убактылуу чектөө киргизилип жатканын кабарлады.Маалыматта ветеринардык-санитардык көзөмөл күчөтүлгөнү айтылат. Мындан улам жугуштуу ылаң катталган өлкөлөр же аймактардагы эпизоотиялык кырдаалга баа берилип, ал жактардан ташылчу мал жандыктарын жана алардан алынган продукцияларды өлкө аймагына алып кирүүгө тыюу салынат.Бул чаралар өлкөдө эпизоотиялык туруктуулукту сактоого, калктын саламаттыгын жана азык-түлүк коопсуздугун камсыздоого багытталганы кошумчаланды.
Ошто төрт эмдүү болгон үй-бүлөгө президент Садыр Жапаровдун атынан Ош шаарынан 3 бөлмөлүү батир белекке берилди. Бул тууралуу мэриядан билдиришти. Батирдин ачкычын президенттин өкүлү Аманкан Кенжебаев менен Ош шаарынын мэри Жанарбек Акаев тапшырды. Батир жаш наристелер үчүн ыңгайлуу шарттар менен толук камсыздалган. Керектүү балдар керебеттери жана коляскалар да тапшырылды. Бул колдоо мамлекет тарабынан үй-бүлөнүн жашоо шартын жакшыртуу жана наристелердин келечегине кам көрүү максатында көрсөтүлдү. Шаар мэри өлкө башчысынын атынан жаш үй-бүлөнү куттуктап, наристелерге бекем ден соолук жана узак өмүр каалады. Өз кезегинде төрт эмдин ата-энеси көрсөтүлгөн камкордук үчүн Президентке терең ыраазычылыгын билдиришти. Белгилей кетсек, үстүбүздөгү жылдын 12-мартында Ош облустук бириккен клиникалык ооруканасынын төрөт стационарында Араван районунун 26 жаштагы тургуну Дилшода Артыкова бир уул, үч кыз төрт эмди жарык дүйнөгө алып келген.