"Кыргызнефтегаз" казып, "Кыргыз Петролеум Компани" ишканасы өндүргөн АИ-80 үлгүсүндөгү майды Ташиевдердин үй-бүлөсү жергиликтүү эки компанияга мажбурлап алдыртып келген. Чуулуу иш боюнча президенттик администрация үн катты. Өлкө башчынын маалымат кызматынын жетекчиси Дайырбек Орунбековдун айтымында, 1952-жылы түзүлгөн "Кыргызнефтегаз" казган чийки мунай Өзбекстанга жөнөтүлүп, ал жактан бензин жана дизель майы болуп чыгып келген. СССР тарагандан кийин өндүрүш чектелген. 1996-жылы "Кыргыз Петролеум Компани" туунду ишканасы түзүлүп, мунайды өлкө ичинде кайра иштете баштайт. Бирок дарамети АИ-80 маркасындагы майга гана жеткен. Кыргызстан ЕАЭБге киргенден кийин евростандарттагы күйүүчү майга өтүп, жергиликтүү өндүрүштөн чыккан майга суроо-талап токтогон.2021-жылдан тарта "Кыргызнетегаз" менен "Кыргыз Петролеум Компани" Камчыбек Ташиевдин таасиринде болуп, жээни Байгазы Матисаков жетекчи болот. Казылган мунайды туунду компания кайра иштетип, Ташиевдин үй-бүлөсү тарабынан түзүлгөн жеке ортомчу компаниялар киргизип, мунайды ошолор өндүрүп жаткандай көрсөтүлгөн. Мамлекеттик компания иштегени менен даяр продукция Ташиевдерге таандык компаниялар аркылуу сатылып, киреше да аталган үй-бүлөгө түшүп турган", — деп жазды Орунбеков. Анын айтымында, АИ-80 бензини жана дизель ички рынокто колдонулбаса да Ташиевдердин фирмасы нефть менен иштеген жергиликтүү эки ири компанияга сатып, мажбурлап алдыртып келишкен."Өкмөттүн уруксаты менен эми "Жунда" жана "Кыргыз Петролеум Компани" ишканаларынан өндүрүлгөн АИ-80 маркасындагы бензин жана дизель Тажикстан менен Афганстанга экспорттоло баштайт. Ал эми Россиядан келген май сыртка чыгарылбайт", — деди Орунбеков.
Жогорку Кеңештин төрт комитетине жаңы төрагалар шайланды. Эл өкүлдөрү аларга жыйында жашыруун добуш беришти. Ага ылайык, депутат Бакыт Тентишев Өнөр жай саясаты, транспорт, отун-энергетикалык комплекс, архитектура жана курулуш боюнча комитетинин төрагалыгына, Гүлнара Акимбаева Конституциялык мыйзамдар, мамлекеттик түзүлүш, жергиликтүү өз алдынча башкаруу жана Жогорку Кеңештин Регламенти боюнча комитетине, Агрардык саясат, суу ресурстары, жер казынасын пайдалануу, экология жана айлана-чөйрөнү коргоо боюнча комитетинин төрагалыгына Кубанычбек Самаков, Илим, билим берүү, инновациялык өнүгүү жана маалыматтык технологиялар, маданият, спорт жана жаштар иштери боюнча комитетинин төрагалыгына Ырысбек Атажанов шайланды.
Бишкекте мотоциклдерди, скутерлерди жана мопеддерди текшерүү боюнча масштабдуу рейддер башталды. Бул тууралуу Милициянын патрулдук кызматынын башкармалыгы кабарлады. Бул иш-чаралар жол кыймылынын коопсуздугун камсыз кылууга, жол кырсыктарын алдын алууга жана эки дөңгөлөктүү транспорттун айдоочуларынын тартибин жакшыртууга багытталган. Патрулдук милициянын кызматкерлери түшүндүрүү иштерин жүргүзүп, Жол кыймылынын эрежелерин эскертип жатышат.