БИШКЕК, 15-мар. — Sputnik. Кыргызгидромет 16-22-март күндөрүнө аба ырайынын божомолун таратты.
Ага ылайык, 18-мартка чейин ашууларда кар көчкү түшүшү мүмкүн. Жолдорго муз тоңуп, тайгак болот. Унаалардын ортосунда 500 метр аралыкты сактоо зарылдыгы эскертилди. Шамалдын багыты өзгөрүлүп турат, ылдамдыгы секундасына 1-6 метрге жетиши мүмкүн.
Бишкекте 16-18-мартта жаан-чачын күтүлбөйт. 19-22-март күндөрү асманды ала булут каптап турат, жаан-чачын жаашынын ыктымалдуулугу аз.
Чүй жана Талас облустары
Аталган облустарда 16-мартта жаан-чачын күтүлбөйт. Түнкүсүн жана эртең менен айрым жерлерде туман түшүшү ыктымал. 17-22-мартта дыйканчылык аймактарда жаан-чачын болбойт. Тоо этектеринде жана тоолуу райондордогу жолдор тоңголок, тайгак болот.
Ош, Жалал-Абад жана Баткен облустары
Ош жана Баткен облустарында 16-мартта айрым жерлерде жаан, тоолуу райондордо кар жаашы мүмкүн. 17-мартта түнү жаан болбогону менен күндүз тоолуу райондордо кар жаайт, дыйканчылык аймактарда жаан-чачын күтүлбөйт. Мындай туруксуз аба ырайы 20-мартка чейин созулат. 21-22-мартта жаан-чачын жаабайт. Ал эми Жалал-Абад облусунда 16-марттан 22-мартка чейин жаан болбойт деп божомолдонгон. Бирок түнкүсүн жана эртең менен айрым аймактарды туман капташы ыктымал.
Нарын жана Ысык-Көл облустары
Нарын менен Ысык-Көлдө 16-мартта түнү жаан-чачын күтүлбөйт. Күндүз айрым жерлерде жаан, тоолуу райондордо кар жаашы ыктымал. 17-мартта күндүз жана 18-мартта түнү тоолуу райондордо кар жаайт, дыйканчылык аймактарда жаан-чачын болбойт. Мындай аба ырайы аймакта 21-мартка чейин уланып, 22-мартта күн ачылат.