Жогорку Кеңештин төрагасы Марлен Маматалиев парламенттин ишин санариптештирүү маселелерине арналган жумушчу кеңешме өткөрдү. Жыйында парламенттин ишин кагазсыз форматка өткөрүү жана ички процесстерди толугу менен электрондук системага өткөрүү маселеси талкууланды. Жүргүзүлүп жаткан реформа алкагында электрондук документ жүгүртүү системасын толук киргизүү каралууда. Демилгеге ылайык, бардык процесстер — кирген каттарды каттоодон тартып мыйзам долбоорлорун макулдашууга чейин коопсуз санариптик платформалар аркылуу жүргүзүлөт. Ошондой эле парламенттин ички ченемдик-укуктук актыларын жаңы талаптарга ылайык келтирүү тапшырмасы берилди. Бул электрондук форматта толук кандуу иш алып барууга шарт түзөт. Мындан тышкары, комитеттердин жана депутаттык топтордун жыйындарын онлайн форматта өткөрүү практикасын киргизүү пландалууда. Бул парламенттин ишинин ыкчамдыгын жана мобилдүүлүгүн жогорулатууга жардам берет.
Министрлер кабинети Нарын облусунда Мамлекеттик чек ара кызматынын аскер базасын куруу үчүн жер тилкесин трансформациялоо тууралуу чечим кабыл алды. Токтомго ылайык, Нарын районунун Доболу айыл аймагындагы 13,2 гектар сугат айыл чарба жери «айыл чарба багытындагы жерлер» категориясынан өнөр жай, транспорт, байланыш, энергетика жана коргонуу багытындагы жерлер категориясына өткөрүлөт. Бул жер тилкеси мамлекеттик менчикте болуп, чек ара кызматынын аскер базасын куруу үчүн пайдаланылат. Нарын райондук мамлекеттик администрациясына жер документтерине өзгөртүүлөрдү киргизүү, жерди максаттуу пайдаланууну камсыз кылуу жана шаар куруу документациясын иштеп чыгуу тапшырылды. Ошондой эле экологиялык, санитардык жана курулуш талаптарын сактоо, ал эми тарыхый-маданий мурастар табылган учурда аларды коргоо каралары белгиленди. Токтом 10 күндөн кийин күчүнө кирет.
Кыргыз Эл жазуучусу Кеңеш Жусупов 89 жаш курагында дүйнөдөн кайтты. Бул тууралуу Маданият, маалымат жана жаштар саясаты министрлигинен билдиришти. Жусупов 1937-жылы 14-апрелде Нарын облусунун Нарын районундагы Эчки-Башы айылында төрөлгөн. Ал кыргыз адабиятынын өнүгүшүнө олуттуу салым кошкон көрүнүктүү жазмакерлердин бири. Калемгердин көп жылдык эмгеги бааланып, Кыргыз Республикасынын “Эмгек баатыры” жогорку наамы, II даражадагы Манас ордени, эл жазуучусу даражалары берилген. Маркум менен коштошуу зыйнаты эртең 15-мартта саат 10:00дө Т. Абдумомунов атындагы Кыргыз улуттук академиялык драма театрында өтөт.