Жогорку Кеңеш Канатбек Чыныбаевди өзгөчө кырдаалдар министри кызматына дайындоого макулдук берди. Талапкерди парламенттин жыйынында президенттин жана министрлер кабинетинин Жогорку Кеңештеги туруктуу өкүлү Бектур Зулпиев тааныштырды. Буга чейин анын талапкерлигин Эл аралык иштер, коргоо, коопсуздук жана миграция боюнча комитети жактырган. Белгилей кетсек, мурдагы өзгөчө кырдаалдар министри Урматбек Шамырканов пара алууга шектелүүдө. Ал күн мурун кызматынан бошотулган.**Кыргызстанда күйүүчү-майлоочу май 2,5-3 сомго кымбатташы мүмкүн. Бул тууралуу Sputnik Кыргызстан маалымат агенттигине Нефтетрейдерлер ассоциациясынын башчысы Канат Эшатов билдирди.Анын айтымында, Россиядан чыккан дүң баа 17-19 пайызга өсүп кеткен. Эшатов абал өзгөрбөсө, баа улам жогорулай берерин кошумчалады.
Улуттук банк быйылкы жылдын эсебинен төртүнчү интервенциясын жасап, 140 миллион доллар сатканын кабарлады. Ал эми жыл башынан бери сомдун курсун кармап туруу үчүн жалпы 546,6 миллион доллар короткон. Мындай кадам менен башкы банк чет элдик акчанын тартыштыгын толуктап, өзгөрүлмө режим учурунда сомдун наркын туруктуу кармап турууну көздөйт.**Африка Биримдигинин өлкөлөрү кулчулук үчүн Европанын айрым мамлекеттеринен кенемте талап кылып БУУнун Эл аралык сотуна кайрылууну мерчемдеп жатат. Бул тууралуу өзүнүн маалымат булактарына таянуу менен Telegraph жазды. "Африка Биримдигинин мүчөлөрү империялык ишмердүүлүк жүргүзүп, кулчулукту гүлдөткөн мурунку колониялык державалардын үстүнөн эл аралык сотторго кайрылуу ниетинде. Алардын айтымында, трансатлантикалык кулчулук адамзатка каршы кылмыш болуп саналат", — деп айтылат макалада. Басылма Африка мамлекеттерине Улуу Британияны Чагос аралын өткөрүп берүүгө мажбур кылган Маврикиянын юридикалык стратегиясы дем бергенин белгилеген. Африкалыктардын доосу Франция, Испания, Португалия жана Улуу Британияга каршы багытталмакчы. Telegraph репарация "Африка менен Глобалдуу Түндүктүн ортосундагы экономикалык теңсиздикти жоюуга" жасалган аракет болорун жазды.
АКШ Израилден Ирандын энергетика тармагына, айрыкча мунай инфраструктурасына сокку урбоону өтүндү. Бул тууралуу Axios порталы ишенимдүү маалымат булактарга таянып жазды. "Ага ылайык, дүйшөмбү күнү Дональд Трамптын администрациясы Израилге кайрылып, Ирандын энергетика тармагындагы объектилерин, өзгөчө мунай инфраструктурасын мындан ары бутага албоого чакырган", — деп айтылат макалада. Чабуулдар башталгандан бери Вашингтон Тель-Авивдин аракеттерин биринчи жолу чектеп жатканы белгиленди. АКШ менен Израиль 28-февралда Ирандын аймагындагы объектилерге сокку ура баштаган. Анын кесепетинен имараттар кыйрап, соңку маалымат боюнча, 1 300 жай тургун каза тапты. Ал эми Иран Израилдин аймагына, ошондой эле Жакынкы Чыгыштагы АКШнын аскердик объектилерине жооп иретинде сокку урууда.