БИШКЕК, 10-мар. — Sputnik. Кыргызстанда ар бир бешинчи баланын канында коргошундун көлөмү көп экени аныкталды. Бул туурасында "Кыргызстандагы саламаттыкты сактоо" журналына жарыяланган изилдөөдө айтылган.
Медиктер, окумуштуулар 1-6 жаштагы балдарды изилдөөгө алган.
Негизги жыйынтыктар:
ата-энелердин бул маселеден кабары аз. Сурамжылоого катышкандардын дээрлик жарымы коргошун менен уулануунун кесепети кандай болорун билбейт;
курамында уулуу металл тиешелүү ченемден ашык, сертификатталбаган курулушта колдонгон сырларды пайдалануу коргошундун негизги булагы экени аныкталган;
ошондой эле чопо жана керамика идиштери, балдардын оюнчуктары да кооптуу дешкен;
боёктордо, идиштерде жана керектөөчү товарлардын курамындагы бул металлдын канча көлөмдө болушун тактап, аныктап туруу үчүн мамлекеттин көзөмөлүн арттыруу зарыл;
калк арасында оор металлдар менен ууланууну көзөмөлдөй турган, заманга бап келген жабдуулар менен камсыздалган мониторинг борборун түзүү жана ар 2–3 жылда бир жолу изилдөө жүргүзүү керек.