БИШКЕК, 6-мар. — Sputnik. Владимир Зеленский украин журналисттери менен баарлашып жатып, согушкерлери менен коркуткан сөздөрдү айткан. РИА Новости опуза Венгриянын премьер-министри Виктор Орбанга тиешелүү экенин божомолдоп жатат.
"Евробиримдиктеги бир адам 90 миллиардды (евро — ред.), болбосо 90 миллиарддык биринчи траншты бөгөттөбөйт деп үмүттөнүп жатабыз. Украин жоокерлеринин куралы бар, биз ойлогондой болбосо ал адамдын дарегин куралдуу күчтөрүбүзгө беребиз, өз тилинде сүйлөшүшсүн", — деген ал.
Венгриянын премьер-министри Виктор Орбан Владимир Зеленскийге жооп берген.
"Зеленскийдин коркутуулары мага тиешелүү эмес. Ал Венгрияга кооптуулук жаратууда. Бирок венгр үй-бүлөлөрүн коргоодон мени баш тарттыра албайт", — деп жазган өкмөт башчы.
Словакия премьери Роберт Фицо Зеленский Орбанга тап берип болгон-бүткөн чектен чыгып кеткенин билдирди.
"Европа биримдигинин жогорку даражалуу өкүлдөрүнүн баарына: Еврокомиссия төрайымы Урсула фон дер Ляйенге, Европа кеңешинин төрагасы Антониу Коштуга, ЕБ тышкы иштер министри Кая Калласка кайрылып, Зеленскийдин акылга сыйбаган опузасынан оолак болууга чакырам", — деди ал.
Эскерте кетсек, Киев январдын аягынан баштап "Дружба" мунай түтүгүнөн отун өткөрбөй калган. Венгрия 18-февралда Украинага дизелдин ташылышын токтотуп, 20-февралдан тарта Евробиримдиктен келчү 90 миллиард евролук насыяны бөгөттөп койгон.
Өлкө ТИМинин жетекчиси Петер Сийяртонун айтымында, мындай кадам Киев режиминин опузасына байланыштуу жасалды. Украина саясий себептерден улам россиялык мунайдын "Дружба" аркылуу өтүшүнө бут тосуп, Бедапештти энергетикалык кризиске кептеп, апрелде өтчү шайлоого таасир этүүгө умтулуп жатканы белгиленген.
Альметьевскиден башталган "Дружба" түтүгү Брянскиден өткөндөн кийин тарап кетет: Украина аркылуу Венгрияга, Словакия жана Чехияга бөлүнөт, ал эми Беларустун аймагы менен Польша жана Германияга жетет.