БИШКЕК, 21-фев. — Sputnik. Президент Садыр Жапаров "Кабар" агенттигине маек куруп, УКМКда кандай реформалар жүргүзүлөрү тууралуу маалымат берди.
Анын айтымында, реформадан кийин УКМК мурдагы КГБдай накта атайын кызмат болот. Жапаров УКМКда ким иштээрин жана эмне жумуш жасаарын эч ким билбеши керектигине токтолгон.
"Атайын кызмат өзүнө тиешелүү чалгындоо, контрчалгындоо, конституциялык түзүлүштү коргоо, террорчулук, экстремизм, бандитизм, баңгизатка каршы күрөш сыяктуу иштер менен алек болот. Экономикага киришпейт. УКМК эмне менен алек болуп жүргөнүн, ким кызматкери экенин эч ким билбеши керек", — деген Жапаров.
ИИМ дагы өздөрүнө түздөн-түз тиешелүү милдеттер менен гана иш алып барат.
Бул үчүн имараттар, техникалык базалар даярдалат. Жарлык чыгып, тиешелүү мыйзамдар Жогорку Кеңеште кабыл алынгандан кийин уюштуруу иштери башталат. Президент мындай реформаны мурда эле жасоону пландап, бирок ар кандай себептер менен улам жылдырып келгенин белгилеген. Бийлик реформаны ишке ашырууга эмдиги жылы киришет.
Президент маегинде УКМКнын иши боюнча мурдагы төрагасы Камчыбек Ташиевге бир нече жолу эскертүү бергенин да белгилеген.
"Досум, УКМКнын кадыр-баркын көтөр. Мурдагы СССРдин КГБсындай баркы болушу керек. Антпесең эл арасында "УКМКнын кызматкеримин" деп күбөлүгүн "камокторго" да көрсөткөн учурлар бар деп бир топ жолу айткам", — деген Жапаров.
Ошондой эле интимдик кызмат көрсөткөндөргө каршы күрөш боюнча видео жарыяланган күнү Ташиевди чакырганын айткан. Анда президент бул тармакты ИИМге бериши зарылдыгын, УКМК мындай иштер менен алектенип, атайын кызматтын деңгээлин түшүрбөшү керектигин эскерткенин кошумчалаган.