БИШКЕК, 18-фев. — Sputnik. Владимир Зеленский АКШ президенти Киевге пайдасы тийбеген чечимдерди кабыл алып койду деп кооптонууда. Бул туурасында ал Axios порталына берген маегинде айтканын РИА Новости жазды.
"Бул анын чечими эмес, тактикасы деген үмүттөмүн", — деген ал.
Зеленский узак мөөнөттүү тынчтык "жеңишти Россияга берет" деген нерсеге негизделбеши керектигин айткан. Ал кырдаалды жөнгө салуу боюнча аракет кылып жатканы үчүн Трампка ыраазылыгын билдирип, бирок аны менен катар эле ыкка көнүү боюнча чакырыктарды "адилетсиз" деп атады.
Басылма маектеши Украина кичинекей болгондуктан ага басым-кысым жасоо алда канча жеңил болот деп айтканын жазды.
Эске салсак, кечээ Россия, АКШ жана Украинанын Женевадагы үч тараптуу сүйлөшүүсү аяктады. Кремлден россиялык топту РФ президентинин кеңешчиси Владимир Мединский жетектеп барганын айтышкан. Сүйлөшүү бүгүн да уланмакчы.
Украинада тынчтык орнотуу процесси
Январдын соңу менен февралдын башында БАЭде Москва, Киев жана Вашингтондун өкүлдөрү кирген коопсуздук боюнча жумушчу топтун жабык сүйлөшүүсү өткөн. Анда АКШ сунуштаган тынчтык планынын айрым көйгөйлүү маселелери талкууланган.
ЖМКлардын маалыматы боюнча, Американын алгачкы планында Донбассты толугу менен Москванын карамагына өткөрүп берүү, аны Крым менен кошо Россияга таандык деп таануу бар. Андан сырткары, согушту жүрүп жаткан жеринен токтотуу, Украина армиясынын санын эки эсе азайтуу жана Украинага чет элдик аскерлер менен ыраакка атылуучу курал-жарак жайгаштырууга жол бербөө каралган.
Кремль буга чейин АКШ Аляскада макулдашылган формула боюнча аймактык маселелер чечилмейин узак мөөнөттү тынчтык орнотуу мүмкүн эмес экенин мойнуна алганын билдирген. Украина Куралдуу күчтөрү Донбасстан чыгып кетиши керек, бул Москванын эң орчундуу шарты.
Быйылкы жылдын эсебинен алганда Женевада өтүп жаткан диалог экинчи сүйлөшүү болуп калды.