Конституциялык сот Садыр Жапаровдун ыйгарым укугунун мөөнөтү жана президенттик шайлоону өткөрүүнүн жол-жобосу боюнча кайрылуусун карап чыгып, президенттик шайлоо 2027-жылдын 24-январында өтөрүн билдирди. Чечимде Садыр Жапаровдун азыркы алты жылы биринчи мөөнөт болуп эсептелери айтылган."2021-жылы шайланган президенттин мөөнөтү 2010-жылкы Конституциянын негизинде алты жыл болуп эсептелет жана ал кыскарбайт. 2021-жылдагы жаңы Конституциядагы беш жылдык мөөнөт мурда башталган президенттик мандатка карата иштебейт. Президент жаңы Баш мыйзамдын талаптарына ылайык ишин улантат. Биринчи мөөнөттөгү алты жыл "эки мөөнөттөн ашпоого" байланышкан чектөөнүн алкагында биринчи мөөнөт катары эсептелет", — деп жазылат маалыматта. Консот мөөнөтүнөн мурда шайлоо өткөрүүгө негиз жок деген чечимге келген. Андай шайлоо Конституциянын 72-беренесинде так көрсөтүлгөн учурларда гана мүмкүн. Белгилей кетсек, өткөн жумада президент Садыр Жапаров өзүнүн ыйгарым укугунун мөөнөтү жана президенттик шайлоону өткөрүүнүн жол-жобосу Баш мыйзамда кандай каралганын чечмелеп берүү өтүнүчү менен Конституциялык сотко кайрылган.Конституциялык сот мамлекет башчынын кайрылуусуна коомдо жана эксперттик чөйрөдө бул маселе боюнча ача пикирлер пайда болуп, мыйзамдык так эместик жаралууда деген пикирлер себеп болгонун билдирген.
Агартуу министрлигинде 2026-2027-окуу жылына карата базистик окуу планы талкууланды. Бул тууралуу ведомстводон маалымдашты. Талкууга агартуу министри Догдуркүл Кендирбаева, орун басары Надира Жусупбекова, Кыргыз билим берүү академиясынын президенти Назира Дүйшеева жана башкалар катышты. Талкуу учурунда 3-8-класстар 11 жылдык программадан 12 жылдык билим берүү программасына өтөөрү, ушул класстардагы сааттардын жана сабактардын өзгөчөлүгү, интеграциялоо маселелери каралды. Ошондой эле 12 жылдыкка өтө турган класстар үчүн окуу китептерин даярдоо маселеси жана окуу пландарын жаңылоо сунуштары талкууланды.
Мурдагы "Чатыр-Көл" кинотеатрынын ордуна курула турган заманбап маданий борбордун эскиздик долбоору даярдалды. Бул тууралуу Бишкек мэриясы билдирди. "Учурда имаратты демонтаждоо иштери жүргүзүлүүдө. 2025-жылдын 5-ноябрында болгон өрттөн кийин мэр тиешелүү кызматтарга объектинин мындан аркы тагдыры боюнча чечим кабыл алууну жана долбоорду ишке ашырууну тездетүүнү тапшырган", — деп айтылат маалыматта. Шаар башчысынын тапшырмасына ылайык, маданий борбордун эскиздик долбоору иштелип чыкты. Иштер улантылууда.
Кыргыз футбол биримдиги 2028-жылы өтө турган Олимпиадалык курама командалар арасындагы Азия кубогун өткөрүү үчүн Азия футбол конфедерациясына расмий түрдө талапкерлигин көрсөттү.Кыргыз футбол биримдигинин маалыматына ылайык, бул мелдеш Азиядагы эң маанилүү турнирлердин бири, ага континенттин 16 күчтүү улуттук командасы катышат. Турнирди Кыргызстанда өткөрүү өлкөнүн футбол инфраструктурасын өнүктүрүүгө, эл аралык аброюн жогорулатууга жана жаштар арасында футболду кеңири жайылтууга чоң салым кошот.