БИШКЕК, 12-фев. — Sputnik. Президент Садыр Жапаров баңгизаттарды мыйзамсыз жүгүртүүгө байланыштуу жоопкерчиликке тартылгандардын ата-энелерин жана жакын туугандарын кабыл алды. Бул туурасында анын маалымат кызматынан кабарлашты.
Жолугушууга келгендер мамлекеттин кармалгандарга карата камакка алуу түрүндөгү бөгөт коюу чарасын үй камагына өзгөртүү мүмкүнчүлүгүн кароону, ошондой эле соттолгондор үчүн жазаны жеңилдетүүнү өтүнүшкөн.
Мындан тышкары, мыйзамдарды гумандаштыруу багытында өзгөртүүлөрдү киргизүү зарылдыгы тууралуу маселе көтөрүлгөн.
"Жапаров кайрылууларды угуп, жарандардын тагдырына тиешелүү маселелерди мамлекет көңүл сыртында калтырбай турганын айтты. Ошол эле учурда ал баңгизаттарды жайылтуу боюнча кылмыштар калктын саламаттыгына, коомдук коопсуздукка жана өлкөнүн келечегине түздөн-түз коркунуч туудурарын айтты", — деп билдиришти маалымат кызматынан.
Кармалгандардын көбү жаштар экендигине токтолушкан. Алардын айтымында, кармалгандардын бардыгы мурда жоопкерчиликке тартылган эмес жана биринчи жолу кармалгандар. Ошондой эле айрымдардын жанынан тыюу салынган заттар аз өлчөмдө чыкканын айтышкан.
"Жапаров биринчи жолу кылмыш жасаган адамдарды, эгерде негиздер болсо жана мыйзамда белгиленген тартиптер сакталса, айрым учурларда ырайым кылуу мүмкүнчүлүгүн кароого даяр экенин баса белгиледи. Мамлекет башчы бул үчүн туугандары расмий өтүнүч менен кайрылышы керектигин, ал белгиленген тартипте караларын айтты", — деп маалымат кызматы билдирди.
Жолугушуунун жыйынтыгында Жапаров жаштар арасында алдын алуу жана түшүндүрүү иштерин күчөтүү, ошондой эле баңгизаттардын жайылуу коркунучуна каршы күрөшүү жаатында мамлекеттик органдардын ведомстволордун өз ара майнаптуу иш алып барышы зарылдыгын белгиледи.
Жапаров өзүнүн администрациясынын тиешелүү башкармалыктарына баңгизаттарга каршы күрөшүү жаатындагы колдонуудагы мыйзамдарды талдап чыгууну тапшырган.