Кыргызстанда жайыттардын деградациясы айыл чарбасы үчүн олуттуу көйгөйлөрдүн бири болуп жатканын Ветеринардык мал чарбасын өнүктүрүү кызматынын Асыл тукум мал чарба, жайыт жана тоют башкармалыгынын башчысы Мыктыбек Каландаров белгиледи. Айрыкча карагана жана алтыкана сыяктуу бадал өсүмдүктөрүнүн жайыттарда көзөмөлсүз көбөйүшү мал үчүн пайдалуу чөптөрдүн азайышына, жердин түшүмдүүлүгүнүн төмөндөшүнө алып келүүдө. Адистердин айтымында, мындай өсүмдүктөр жайыттарды басып алып, мал жайууга тоскоолдук жаратып, экологиялык тең салмактуулукту да бузат.Бул маселени чечүү максатында мамлекет тарабынан карагана, алтыкана сыяктуу бадалдардан жайыттарды тазалоо, калыбына келтирүү жана натыйжалуу пайдалануу боюнча ар кандай ыкмалар колдонулуп жатат.
Бүгүнкү маекте биз жайыттарды арылтуу иштери кандай жүрүп жатканын, кайсы ыкмалар натыйжалуу экенин, илимий негизделген сунуштар жана бул процесске дыйкандар менен жергиликтүү жамааттардын катышуусу кандай болушу керектигин талкуулайбыз.